Արաբկիրում «Ելք» դաշինքի քարոզարշավի ժամանակ այսօր` ապրիլի 27-ին, Նիկոլ Փաշինյանին մոտեցավ մի տարեց տղամարդ եւ հետաքրքրվեց, թե ինչպես է քաղաքապետի թեկնածուն պայքարելու Երեւանի ավագանու ընտրություններին ընդառաջ ձայներ ձեռք բերելու համար քաղաքացիներին այլ հասցեներում գրանցելու դեմ:
«Ավանի համալսարանական շենքում իմ բարեկամն ա ապրում, երեկ գնացել էր աղբի գումարը մուծելու ու հայտնաբերել ա, որ իր տանը ոմն Գեղամ ա գրանցված: Առանց հարցնելու են գրանցել ու դա միակ դեպքը չէ»,-ասաց տարեց տղամարդը:
Նիկոլ Փաշինյանն էլ առաջարկեց, որ տվյալ քաղաքացին դիմում գրի, որ հաշվառումից հանեն «այդ Գեղամին»:
«Հարցը էդ մի դեպքը չի, էդ ընդհանուր խնդիրը ինչպե՞ս պետք է լուծվի: Իմ համար չեմ ասում, ձեզ համար եմ ասում: Ինքը մեկ ա հանրապետականին ա ընտրելու: Ուղղակի հազարավոր մարդկանց են տենց առանց հարցնելու բերում ու գրանցում ձայների համար»,-ասաց նա ու նշեց նաեւ շենքի հասցեն, որտեղ գրանցվել է դեպքը:
Հիշեցնենք, որ Երեւանի ավագանու ընտրությունները տեղի է ունենալու մայիսի 14-ին, որին մասնակցելու է Հայաստանի հնարապետական կուսակցությունը, «Երկիր Ծիրանի» կուսակցությունն ու «Ելք» դաշինքը: