«Երկիր Ծիրանի» կուսակցության անդամները, Երեւանի ավագանու թեկնածուներն այսօր՝ մայիսի 1-ին, քարոզարշավ են իրականացրել Շենգավիթ վարչական շրջանում: Նրանք շրջում են վարչական շրջանի փողոցներով ու բակերով, բնակիչներին ներկայացնելով իրենց ծրագրերը:
Լրագրողների հետ զրույցում «Երկիր Ծիրանի» կուսակցության գերագույն խնդիրն է, որ իրավունքի գերակայությունն իշխի Երեւանում, Հայաստանում: Այս մասին լրագրողների հետ զրույցում նշել է կուսակցության ավագանու թեկնածու Հայկ Պետրոսյանը:
Նրա խոսքով, իրենց առաջնային խնդիրը կոռուպցիան վերացելն է. «Շատ կարեւոր է, որ բոլոր գործողությունները լինեն թափանցիկ, եւ մեր քաղաքացիները ներգրված լինեն հասարակական, հանրային կյանքին»:
Անդրադառնալով ՀՀԿ-ի կողմից Երեւանի ավագանու թեկնածու Լեւոն Իգիթյանի աղմկահարույց հայտարարությանը, թե «մենք շատ դաժան եւ ծանր պատմություն ենք ունեցել, եւ էսօր հանկարծ մի «դեվչոնկա» հայտարարում է՝ ես Երեւանը գրավելու եմ. ուզում եմ հասկանալ՝ ի՞նչն է գրավելու», «Երկիր Ծիրանիի» թեկնածուն արձագանքեց. «Պարոն Իգիթյանին նախ եւ առաջ խորհուրդ կտամ հարգալից վերաբերվել։ Իրանք միշտ խոսում են, որ կայացած քաղաքական ուժ են, նույնիսկ շոշափվում է, որ լավ մենեջերներ են։ Ընդհանուր առմամբ, հասուն քաղաքական գործիչը եւ հասուն քաղաքական ուժը երբեւիցե իրեն թույլ չի տալիս այդ մակարդակով խոսել որեւէ քաղաքական ուժի մասին»: