Իլոն Մասկի SpaceX ընկերությունը ԱՄՆ հետախուզական վարչության պատվերով ուղեծիր է դուրս բերել NROL-76 կոչվող տիեզերական սարք։
Ընկերությունն այսպիսով իր պատմության մեջ առաջին անգամ ռազմական արբանյակ է ուղեծիր դուրս բերել։ Հրթիռի առաջին աստիճանը մեկնարկից հետո հաջողությամբ վերադարձել է Երկիր։
Արբանյակը ուղեծիր է դուրս բերել Falcon 9 հրթիռակիրը, հայտնել է BBC–ի Ռուսական ծառայությունը։
Ի սկզբանե արբանյակի արձակումը ծրագրված էր ապրիլի 30-ին, սակայն վերջին պահին այն հետաձգվել էր հրթիռի սենսորների հետ կապված խնդիրների պատճառով։
Իր հայտարարության մեջ ընկերությունը չի նշել, թե հատկապես ինչ օբյեկտ է դուրս բերվել ուղեծիր, պատճառաբանելով, որ դա գաղտնի տեղեկություն է։
Ռազմական հետախուզության վարչությունը, որը պատվիրել էր այդ արձակումը, լրտեսական արբանյակների օպերատորն է։