Հայաստանի զորամասերից մեկի մարտական դիրքում ժամկետային զինծառայող է վիրավորվել: Հրազենային վիրավորում ստացած կրտսեր սերժանտ Գագիկ Առուշի Մեսրոպյանը հոսպիտալ տեղափոխվելու ճանապարհին մահացել է: Քննչական կոմիտեի տեղեկացմամբ՝ նախնական տվյալներով, Մեսրոպյանը վնասվածքը ստացել է ծառայակցի կողմից զենքի հետ վարվելու կանոնները խախտելու հետեւանքով: Քրեական գործ է հարուցվել:
Իսկ Արցախի զորամասերից մեկի մոտ ջրամբարում ջրահեղձ եղած զինծառայող Ռուբեն Մնացականյանի մարմինը դեռեւս չեն գտել: Որոնողական աշխատանքները շարունակվում են: Հիշեցնենք, որ մայիսի 8-ի առավոտյան ճանապարհա-տրանսպորտային պատահարի հետեւանքով զորամասին հարակից ջրամբարում ջրահեղձ են եղել պաշտպանության բանակի զինծառայողներ Ռուբեն Բարսեղյանը Ռաֆայել Բիշարյանը եւ Ռուբեն Մնացականյանը: Բարսեղյանի եւ Բիշարյանի մարմինները հայտնաբերել են:
Ոստիկանության Երեւանի ՊՊԾ գնդի զինված զավթման գործով 14 մեղադրյալների մասով քրեական գործն ուղարկվել է դատարան: Հայտնի են սպանությունների մեջ մեղադրվողները. նրանք են Արմեն Բիլյանն ու Սմբատ Բարսեղյանը: Հարուցված քրեական գործից 14 մեղադրյալների վերաբերյալ անջատված քրեական գործի նախաքննությամբ պարզվել է, որ հարձակման ընթացքում Արմեն Բիլյանի կողմից արձակված կրակոցից սպանվել է գնդում ծառայություն իրականացնող ոստիկանության ենթասպա Գագիկ Մկրտչյանը, իսկ Սմբատ Բարսեղյանի կողմից սպանվել է գնդապետ Արթուր Վանոյանը: Հուլիսի 30-ին էլ Բարսեղյանի կողմից սպանվել է ոստիկանության ենթասպա Յուրի Տեփանոսյանը: Երկու ոստիկանի սպանության մեջ մեղադրվող Սմբատ Բարսեղյանի փաստաբան Հայկ Ալումյանը մեզ հետ զրույցում տեղեկացրեց, որ Բարսեղյանը չի ընդունում իրեն առաջադրված մեղադրանքը:
Ադրբեջանական սադրանք Մոսկվայում եւ Սանկտ Պետերբուրգում: Մայիսի 9-ին Ռուսաստանի մայրաքաղաքում Երկրորդ աշխարհամարտում զոհվածների հիշատակին կազմակերպված «Անմահների գունդ» երթի ժամանակ հայերի եւ ադրբեջանցիների միջեւ միջադեպ է տեղի ունեցել: Ըստ տեղեկությունների՝ այն հրահրել են երթի ադրբեջանցի մասնակիցները, որոնք վրդովվել են Արցախի դրոշի առկայությունից: Ռուսաստանի հայերի միության տեղեկացմամբ՝ սադրիչները Համառուսական ադրբեջանական կոնգրես կազմակերպության ներկայացուցիչներն են եղել, որի գործունեությունը Ռուսաստանի արդարադատության նախարարության կողմից դադարեցված է:
Նման միջադեպ է տեղի ունեցել նաեւ Պետերբուրգում: Ադրբեջանցիները փորձել են խանգարել Արցախի դրոշով ընթացող հայերի երթը եւ ծեծկռտուք սարքել: Սանկտ Պետերբուրգում Հայաստանի գլխավոր հյուպատոսարանը հաստատել է լուրը: Սադրանքի արդյունքում 6 ադրբեջանցի է ձերբակալվել:
Նորաշենի գյուղապետի մեքենայի ուղղությամբ կրակահերթ արձակելու մեջ կասկածվողների ինքնությունը հայտնի է, նրանք հետախուզվում են: Միջազգային հետախուզում է հայտարարվել 39-ամյա Ռոլանդ Գալուստովի, 23-ամյա Ռոբերտ Գալստյանի, 28-ամյա Արթուր Նազարյանի եւ 28-ամյա Դերենիկ Սիմոնյանի նկատմամբ: Մայիսի 3-ի երեկոյան Արտաշատ քաղաքից Վերին Արտաշատ գյուղ տանող ճանապարհին նրանք «Լադա Պրիորա» ավտոմեքենայով փակել են Նորաշենի համայնքապետարանի վարորդ Կարեն Ղազարյանի վարած «ՎԱԶ 2107»-ի ճանապարհը եւ կրակահերթ արձակել նրա եւ ուղեւորի՝ Նորաշենի գյուղապետ Նորայր Գրիգորյանի ուղղությամբ: Վարորդը վնասվածքներով հիվանդանոց է տեղափոխվել: Կրակողները դեպքի վայրից փախուստի են դիմել:
Սյունիքի մարզում ավտովթար է տեղի ունեցել: Երեւան-Մեղրի ավտոճանապարհին իրար են բախվել «ՎԱԶ 21013» եւ Opel Vectra մակնիշների մեքենաները: Վթարի հետեւանքով 8 մարդ, այդ թվում երկու երեխա՝ 4 եւ 9 տարեկան Արմինե եւ Ալվարդ Մարտիրոսյանները, վնասվածքներով Գորիսի հիվանդանոց են տեղափոխվել: Ըստ տեղեկությունների՝ վարորդներն ու հիվանդանոց տեղափոխված 46-ամյա Էդիկ Գրիգորյանը զինվորական են:
Եվս մեկ խոշոր վթար տեղի է ունեցել Արարատի մարզում: Երեւան-Մեղրի ավտոճանապարհի՝ Տիգրանաշենի ոլորանների սկզբնամասում բախվել են Opel եւ Mercedes մակնիշների ավտոմեքենաները: Վթարի հետեւանքով Opel-ի վարորդը՝ 40-ամյա Լաերտ Գրիգորյանը եւ ուղեւորը մարմնական վնասվածքներով տեղափոխվել են հիվանդանոց:
Մայիսի 10-ին արտարժույթի շուկայում գրանցվել են հետեւյալ փոխարժեքները. դոլարն ու եվրոն էժանացել են՝ կազմելով, համապատասխանաբար, 484 եւ 526 դրամ: Ռուբլու փոխարժեքը եղել է 8 դրամ 35 լումա, ֆունտինը՝ 627 դրամ:
Մայիսի 11-ին հանրապետության շրջանների մեծ մասում ժամանակ առ ժամանակ անձրեւ եւ ամպրոպ է սպասվում, առանձին հատվածներում՝ կարկուտ: Օդի ջերմաստիճանը 4-5 աստիճանով կնվազի, իսկ հետո աստիճանաբար կբարձրանա: Երեւանում նույնպես ժամանակ առ ժամանակ տեղումներ կլինեն: Մայրաքաղաքում գիշերը կդիտվի +13+15, ցերեկը՝ +26+28 աստիճան տաքություն: