Հայաստանում Բելառուսի դեսպան Իգոր Նազարուկը հրաժարվեց պատասխանել բլոգեր Ալեքսանդր Լապշինի մասին հարցին:
Լրագրողների հետ զրույցում NEWS.am-ի թղթակիցը բելառուս դիվանագետից հետաքրքրվեց, թե ինչ կարծիք ունի Հայաստանի համար զգայուն խնդիրների, օրինակ՝ բլոգեր Ալեքսանդր Լապշինի գործով Բելառուսի՝ հայկական կողմի համար ոչ այնքան բարեկամական դիքորոշման հարցում:
Հարցը մինչեւ վերջ չլսելով՝ դեսպանը հայտարարեց, որ հրաժարվում է պատասխանել, քանի որ հարցը ոչ կոռեկտ է համարում: Հստակեցմանը՝ ի՞նչն է, նրա կարծիքով, ոչ կոռեկտ, քանի որ չի՞ մտնում ՀԱՊԿ-ին նվիրված միջոցառման թեմայի մեջ: «Հավաքական անվտանգության պայմանագիրը համատեղ ջանք է, իսկ ձեր հարցն ապակառոցողականությանն է ուղղված: Ձեր հարցը չի նպաստում բարեկամական մթնոլորտի ամրապնդմանը»,- ասաց դեսպանը:
Նախկինում NEWS.am-ը հայտնել էր, որ Ռուսաստանի, Իսրայելի եւ մի շարք երկրների քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։
Նման անձանց մուտքն Ադրբեջան արգելվում է, Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ հետախուզում էր հայտարարել՝ «Պետական սահմանի մասին» օրենքը խախտելու համար:
Հունվարի 17–ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26–ին Մինսկի դատարանը մերժել էր Լապշինի փաստաբանների բողոքը:
Ռուսաստանը եւ Իսրայելը փորձել են հասնել արտահանձնման որոշման չեղարկմանը: Սակայն Բելառուսի նախագահ Ալեքսանդր Լուկաշենկոյի վերջերս կայացած մամուլի ասուլիսից հետո ակնհայտ էր, որ Լապշինին կարտահանձնեն:
Փետրվարի 7-ի երեկոյան Ալեքսանդր Լապշինին Բաքու են տեղափոխել:
