Հայաստանում Բրիտանական խորհուրդն այսօր` նոյեմբերի 22-ին արձագանքել է ՍԻՄ կուսակցության նախագահ Հայկ Բաբուխանյանի այն հայտարարությանը, ըստ որի ՍԻՄ-ը պահանջում է դադարեցնել Բրիտանական խորհրդի գործունեությունը Հայաստանում, քանի որ այն աջակցել է Հայաստանում ադրբեջանական ֆիլմերի փառատոնի անցկացմանը:
«Ցանկանում ենք նշել, որ Բրիտանական խորհրդի նպատակն է միջմշակութային երկխոսության հաստատմանը եւ աշխարհի 100-ից ավելի երկրներում տեղակայված մեր գրասենյակների գործունեությունը միտված է հենց այդ առաքելության իրականացմանը: Սակայն, տվյալ դեպքում Բրիտանական խորհուրդը Հայաստանում ադրբեջանական ֆիլմերի փառատոնի կազմակերպմանը չի մասնակցել եւ չի աջակցել փառատոնի անցկացմանը»,- ասված է Բրիտանական խորհրդի հաղորդագրության մեջ:
Հայկ Բաբուխանյանը նաեւ հայտարարել էր, որ Բրիտանական խորհուրդը Ծաղկաձորում կազմակերպել է հատուկ սեմինար` նվիրված սեռական փոքրամասնությունների խնդիրներին եւ դրանց լուսաբանմանը, ինչն, ըստ Բաբուխանյանի, «ոչնչացնում է հայ ազգի բոլոր տրադիցիաները, հայ ազգի կառուցվածքը»:
Այս առնչությամբ, Բրիտանական խորհուրդը նշել է. «Բրիտանական խորհուրդը Միացյալ Թագավորությունում եւ ամբողջ աշխարհում որդեգրել է հավասար հնարավորությունների եւ բազմազանության քաղաքականություն, համաձայն որի կազմակերպությունն իր գործունեության մեջ բացառում է խտրականության բոլոր ձեւերը: Քննարկում-հանդիպման կազմակերպումը բխում էր հավասար հնարավորությունների եւ բազմազանության մեր քաղաքականության սկզբունքներից: Սեռական փոքրամասնությունների իրավունքների պաշտպանությունն ու հանդուժողականության տարածումը բխում է նաեւ ՄԱԿ-ի «Սեռական կողմնորոշման եւ գենդերային ինքնության» հռչակագրից, որին միացել է նաեւ Հայաստանը»:
Խորհուրդը նաեւ տեղեկացրել է, որ Բայկ Բաբուխանյանը սխալ տեղեկություն է տարածել, թե իբր Ռուսաստանում Բրիտանական խորհրդի գործունեությունն արգելված է: «Ցանկանում ենք տեղեկացնել, որ մինչ օրս Մոսկվայում տեղակայված մեր գրասենյակն ակտիվորեն շարունակում է իր գործունեությունը»,- ասված է Խորհրդի հաղորդագրության մեջ: