Ադրբեջանը փաստացի անտեսում է ԵԱՀԿ Մինսկի խմբի միջնորդական առաքելությունը` վերածվելով կողմի, որի հետ անհնար է բանակցություններ վարել: Այս մասին NEWS.am-ի թղթակցին հայտնել է ՀՅԴ խորհրդարանական խմբակցության ղեկավար Արմեն Ռուստամյանը:
Խոսելով շփման գծում հրադադարի ռեժիմի վերաբերյալ միջնորդների վերջին հայտարարության մասին` պատգամավորն ասել է. «Ես կարծում եմ, որ ԵԱՀԿ Մինսկի խումբը վաղուց պետք է հանդես գար հասցեագրված հայտարարություններով: Եւ մենք բազմիցս հայտարարել ենք, որ չհասցեագրված հայտարարություններն ու կողմերի միջեւ հավասարության նշան դնելը խթանում են շփման գծի երկայնքով նոր խախտումները: Այս անգամ, կարծում եմ, երբ Ադրբեջանը կտրականապես հրաժարվեց կատարել Վիեննայում եւ Սանկտ Պետերբուրգում իր վրա վերցրած պարտականությունները, վերջնականապես լցրեցին ԵԱՀԿ Մինսկի խմբի միջնորդների համբերության բաժակը: Եւ, ինչպես ասում են` լավ է ուշ, քան երբեք: Հայտարարությունը հնչեց, եւ այդ հայտարարությունները, կարծում եմ, պետք է հետեւողական լինեն»: Ըստ նրա` դրանց պետք է հետեւեն գործողությունները: «Այսինքն` պետք է շատ հստակ արձանագրվի, որ Ադրբեջանը փաստացի անտեսում է միջնորդական առաքելությունը` դառնալով կողմ, որի հետ անհնար է բանակցություններ վարել: Ըստ էության, Ադրբեջանի առջեւ պետք է դրվի հետեւյալ հարցը` արդյոք նա խաղաղ կարգավորման կողմնակից է, թե ոչ: Եւ եթե ոչ, բնականաբար, միջազգային հանրությունը պետք է դատապարտի ու ճնշում գործադրի Բաքվի վրա նրան բանակցային գործընթաց վերադարձնլու համար», - նշել է Ռուստամյանը: Նա հավելել է, որ բնականաբար, ակնհայտ է միջազգային նորմերին Ադրբեջանի վերապահումով մոտեցումը: «Ադրբեջանը սուլթանություն է դարձել, որը պատրաստ չէ բանակցությունների եւ որը թքած ունի միջազգային նորմերի վրա», - ընդգծել է ՀՅԴ խմբակցության ղեկավարը:
Հիշեցնենք, որ ԵԱՀԿ Մինսկի խմբի համանախագահները դատապարտել են ղարաբաղյան հակամարտության գոտու շփման գծում հրադադարի ռեժիմի վերջին խախտումները եւ կողմերին կոչ են արել անհրաժեշտ քայլեր ձեռնարկել՝ հակամարտության գոտում իրադրության հետագա սրումը կանխելու համար:
«Բազմաթիվ հավաստի աղբյուրներից հավաքված տեղեկատվության համաձայն՝ Ադրբեջանը մայիսի 15-ին շփման գծում հրթիռ է արձակել՝ ոչնչացնելով ռազմական տեխնիկա։ Մայիսի 16-ի երեկոյան եւ հաջորդ օրը հայկական զինված ուժերը պատասխանել են տարբեր տրամաչափի ականանետային կրակահերթերով։ Երկու կողմերի նման գործողությունները հրադադարի ռեժիմի զգալի խախտում եւ տագնապի առիթ են»,- ասված է եռանախագահների հայտարարությունում: