Երեկ երեկոյան ադրբեջանական կողմը կրակ է բացել Տավուշի մարզի սահմանամերձ Բաղանիսի ուղղությամբ: Բաղանիսի գյուղապետ Նարեկ Սահակյանը տեղեկացրել է, որ հակառակորդի գնդակոծության հետեւանքով վնասվել է գյուղի 2 տուն՝ մեկի տանիքը, մյուսի՝ ջրհորդանը:
Իսկ Արցախի պաշտպանության նախարարությունը ստիպված է եղել հերքել ադրբեջանական կողմի տարածած հերթական ապատեղեկատվությունը: Ադրբեջանի պաշտպանության նախարարությունը հայտարարել է, թե արցախա-ադրբեջանական զորքերի շփման գծում, իբր, արցախյան հրամանատարական դիտակետ եւ տեսադիտարկման համակարգ են ոչնչացրել: Հաղորդագրությանը նույնիսկ տեսանյութ են կցել, որն Արցախի պաշտպանության բանակում անհաջող բեմադրություն են որակել:
Պաշտպանության նախարարության զորամասերից մեկի պահեստում պայմանագրային զինծառայողի դի են հայտնաբերել՝ կախված վիճակում: 36-ամյա ենթասպա Մելիք Խաչատրյանի կողքին նաեւ նամակ են գտել: Դատաբժշկական փորձաքննություն է նշանակվել, փորձում են պարզել Խաչատրյանի մահվան հանգամանքները:
Արցախում հակառակորդի արձակած կրակոցից հրազենային վիրավորում ստացած Ալիկ Ավանեսյանը վիրահատվել է: Չի բացառվում, որ առաջիկայում եւս մեկ վիրահատության ենթարկվի: Ժամկետային զինծառայողի վիճակը դեռ ծանր է. նա Ստեփանակերտի հոսպիտալում է, Երեւան տեղափոխվել առայժմ չի կարող: Ավանեսյանը Սյունիքի մարզի Տաթեւ համայնքից է, շուրջ մեկ տարի առաջ է զորակոչվել: Նա սոցիալապես անապահով ընտանիքից է, քույր ու եղբայր ունի:
Կառավարության առաջարկով Ազգային ժողովի հաջորդ արտահերթ նիստը գումարվելու է հունիսի 7-ին: Գործադիրը նաեւ նիստի օրակարգն է սահմանել: Իսկ մարզպետերը կզրկվեն շաբաթօրյա հանգստից: Վարչապետ Կարեն Կարապետյանը որոշել է մարզերում կառավարության անդամների մասնակցությամբ քննարկումներ կազմակերպել հրատապ լուծում պահանջող հարցերի շուրջ: Գործադիրի արտագնա նիստերի կարիք վարչապետը չի տեսնում. ամեն անգամ մարզեր կմեկնեն խնդրի համար պատասխանատու գերատեսչությունների ղեկավարները:
Զինվորական ծառայությունից խուսափած անձանց քրեական հետապնդումը կասեցնող օրենքի գործողության ժամկետը հերթական անգամ երկարաձգվել է. նոր ժամկետ է սահմանվել մինչեւ 2017 թվականի մայիսի 1-ը: Պաշտպանության նախարարը, սակայն, դեմ է այս պրակտիկային: Վիգեն Սարգսյանը մտավախություն ունի, որ սա կարող է ոչ թե խթանել Հայաստանից դուրս գտնվողների վերադարձին, այլ նպաստել երիտասարդության արտահոսքին: Նման խնդրից խուսափելու համար նախարարն առաջարկ ուներ:
Կարեն Կարապետյանն ուշադրություն հրավիրեց լաբորատորիաների գործունեության ուղղությամբ. ոչ ամբողջական եւ հակասող փորձարկումների դեպքեր են հայտնաբերվել: Պետք է ուշադիր լինել նաեւ արտահերթ ու պարբերաբար իրականացվող գնահատումների հարցում. բիզնեսը պետք է ազատություն ունենա, բայց որեւէ երկրում չվնասի մեր արտադրանքի վարկանիշին:
Այսօր նկատողություն ստանալու հերթը գյուղնախարարինն էր: Իգնատի Առաքելյանը զեկուցել է ֆերմերներին պետական սուբսիդավորման շնորհիվ ցածր գնով՝ մեկ լիտրը 314-ի փոխարեն 280 դրամով վառելիք տրամադրելու հարցը: Որոշումն ընդունվել է, բայց Կարեն Կարապետյանը զարմացել է. չենք ուշացե՞լ:
Կառավարության որոշմամբ՝ եւս մեկ երկրի քաղաքացիներ կկարողանան առանց վիզայի Հայաստան այցելել: Այս անգամ արտոնությունից կօգտվեն կատարցիները: Հայաստանի եւ Կատարի միջեւ արդեն ուղիղ չվերթ է գործում, այդ երկրից զբոսաշրջիկների թիվն աստիճանաբար ավելանում է: Շավարշ Քոչարյանը հույս ունի, որ կսկսեն ավելի շատ ժամանել նաեւ պոտենցիալ ներդրողներ ու անշարժ գույքի գնորդներ:
Այսօրվա նիստում կրկին հաստատվեց օֆշորային երկրների ցանկը։ Ֆինանսների նախարարը լրագրողների հետ զրույցում բացատրեց դրա անհրաժեշտությունը: Օֆշորների հետ գործարքները նախկինի պես չեն արգելվում։ Կառավարությունը պարզապես հետեւում է, որ երկրի ներսում գործողության պարագայում բոլոր հարկերը վճարվեն:
Սերժ Սարգսյանն այսօր պաշտոնապես Շառլ Ազնավուրին հանձնեց նրա երեւանյան կեցավայրի բանալին: Այսուհետ այն պատկանելու է «Ազնավուր» հիմնադրամին եւ դառնալու է մաեստրոյի տուն-թանգարանը։ Նախագահն ուրախ է, որ այս թանգարանը հարստացնելու է Երեւանն ու նոր լիցք է հաղորդելու մայրաքաղաքի մշակութային կյանքին: Ինքը՝ մաեստրոն, վստահեցրեց, որ «Ազնավուր» հիմնադրամի ստեղծման նախաձեռնությունը Հայաստանի ապագայի հանդեպ իր նվիրվածության վկայությունն է:
Հինգ հարկանի շենքը գտնվում է Կասկադի հարեւանությամբ: Այն ներառում է թանգարան, բացօթյա համերգասրահ՝ նախատեսված մինչեւ 150 հանդիսատեսի համար, ինչպես նաեւ Ազնավուրի կեցավայրը: Տուն-թանգարանի բացումը նախատեսվում է 2018 թվականին: Մինչ այդ, «Ազնավուր» հիմնադրամի տնօրենն այսօր պատմել է, թե ինչպիսին է այն լինելու: Ի դեպ՝ Ազնավուրի որդին՝ Նիկոլան, երեկ Տաթեւի վանական համալիրում մկրտվել է: Ազնավուրը երջանիկ է, որ որդին հավատարիմ է մնացել իր արմատներին:
Երեխաների իրավունքների պաշտպանության միջազգային օրվա առիթով Հայաստանում տարբեր միջոցառումներ են կազմակերպվել: Տոնական տրամադրություն էր տիրում նաեւ Ազգային ժողովի բակում: Պատգամավորները հյուրընկալել են երեխաներին, զբոսնել նրանց հետ ու լուսանկարվել: Խորհրդարանականների մաղթանքը, նաեւ ցանկությունը մեկն է. երջանկություն եւ բարեկեցիկ ապագա:
Նոր Խարբերդի մասնագիտացված մանկատուն այցելած Արտեմ Ասատրյանին էլ փորձություն էր սպասվում. նախարարը սեղանի թենիս խաղաց մանկատան սաներից Համլետի Արզումանյանի հետ ու պարտվեց:
Երեւանում մահվան ելքով վրաերթ է տեղի ունեցել: Բաղրամյան պողոտայում Opel մակնիշի մեքենան վրաերթի է ենթարկել հետիոտնին: Վերջինը փորձել է փողոցը հատել չթույլատրված հատվածով: Մեքենայի վարորդը՝ 30-ամյա Գրիգոր Գրիգորյանը, փախուստի չի դիմել: Վրաերթի ենթարկվածին հիվանդանոց են հասցրել, սակայն գիտակցության չգալով՝ տուժածը մահացել է:
Խոշոր վթար է տեղի ունեցել Տավուշի մարզում: Դիլիջան-Իջեւան ավտոճանապարհին Mercedes եւ երկու Nissan մակնիշի մեքենաների բախման հետեւանքով 12 մարդ մարմնական վնասվածքներով հիվանդանոց է տեղափոխվել: Տուժածներից մեկը, գիտակցության չգալով, մահացել է: Mercedes-ի ուղեւորները Տավուշի Կոթի գյուղից են, Nissan մեքենաներինը՝ Կոտայքի Առինջ գյուղից:
Դոլարն ու եվրոն շարունակում են թանկանալ: Դոլարի փոխարժեքն այսօր կազմել է 482 դրամ, եվրոյինը՝ 541, ռուբլունը՝ 8 դրամ 52 լումա, ֆունտինը՝ 619 դրամ:
Հունիսի 2-ին հանրապետությունում երեկոյան ժամերին սպասվում է անձրեւ եւ ամպրոպ: Երեւանում նույնպես երեկոյան ժամերին կարճատեւ տեղումներ կլինեն: Մայրաքաղաքում գիշերը կդիտվի +10+12, ցերեկը՝ +26+28 աստիճան տաքություն: