Ադրբեջանցի լրագրող Աֆղան Մուխթարլըին առեւանգողները ոստիկանական համազգեստով են եղել։ Այս մասին հաղորդում է contact.az-ը՝ վկայակոչելով փաստաբան Նեյմաթ Քերիմլիին։
Նրա խոսքով, երբ Մուխթարլըն տուն է վերադարձել, հանկարծակի նրա առջեւ ավտոմեքենա է հայտնվել, որից ոստիկանական համազգեստով երեք անձինք են դուրս եկել։ Նրանց հետ եւս մեկն է եղել՝ քաղաքացիական հագուստով։ Նրանք Մուխթարլըին ուժով նստեցրել են Opel մակնիշի ավտոմեքենան եւ ծեծի ենթարկել։ Նեյմաթ Քերիմլին ասել է, որ ադրբեջանցի լրագրողին դուրս են բերել Թբիլիսիից, հետո գլխին պարկ անցկացրել ու կապել ձեռքերը։ Որոշ ժամանակ անց նրան մեկ այլ ավտոմեքենա են տեղափոխել։
Մուխթարլըին ավտոմեքենայից դուրս են բերել արդեն Ադրբեջանի տարածքում։ Նա ճանաչել է սահմանապահ ոստիկանության վարչության բաժանմունքը։ Հետո Ջերո անունով ինչ-որ մեկին ասել են, թե Աֆղան Մուխթարլըն արդեն իրենց ձեռքում է։ Հաջորդ օրը նրան Բաքու են տարել։ Երեկոյան գործ է հարուցվել, եւ գործընթացում ներգրավվել են փաստաբանները, նշել է իրավաբանը։