Զանգվածային անկարգություններին մասնակցելու մեջ մեղադրվող Արարատ Խանդոյանն այսօր` հունիսի 27-ին, Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում հանդես եկավ պաշտպանական ճառով: Նա իր ճառում նշեց, որ իր դեմ հարուցված քրեական գործը շինծու է եւ դատավորն ու դատախազը կարծես «հոլիվուդյան ֆիլմի սցենարով գրված քրեական գործի մրցանակի համար են պայքարում»:
«Եվ դատարանը, եւ դատախազը կոտորում են իրենց, թե որ մեկը կշահի մրցանակը, սակայն, ասեմ, որ ստրուկները միշտ մնում են ստրուկ, քանի որ ոչ ոք իրենց հետ հաշվի չի նստում, նրանց միայն հրամաններ են տալիս: Երկու ոստիկանները, որոնք իմ դեմ ցուցմունք են տվել`ստել են»,-ասաց նա:
Արարատ Խանդոյանն անդրադառնալով «Սասնա ծռեր» խմբի անդամների գործողություններին, նշեց, որ նրանք այդ քայլին են գնացել` ելնելով օրվա հրամայականից: Նա նշեց, որհույս չունի, որ դատարանը արդարացման որոշում կկայացնի, քանի որ այն ծառայում է իշխանություններին:
Նա իր վերջին խոսում նշեց`«Ազատություն քաղբանտարկյալներին, «Սասնա ծռերին», իսկ ռեժիմին` մահ»:
Արարատ Խանդոյանը դատարան էր եկել գլխարկով, դատարանը նրան զգուշացրեց հանել այն, սակայն, նա հրաժարվեց:
Դատարանը հեռացավ խորհրդակցական սենյակ, դատավճիռը կհրապարակվի այսօր, ժամը 15:00-ին:
Նշենք, որ Արարատ Խանդոյանի համար մեղադրող դատախազ Հայկ Պետրոսյանը պահանջել էր 4 տարվա ազատազրկում:
Ըստ մեղադրական եզրակացության՝ Արարատ Խանդոյանը 2016թ. հուլիսի 20-ին Երեւանում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով եւ վնասելով արտահայտված զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ` ձեռքերով եւ ոտքերով հարվածներ է հասցրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշքշել եւ փորձել է խլել ոստիկանության ծառայողի վահանը:
Խանդոյանը կալանքի տակ է: