Կառավարության հատկացրած միջոցներով Ռուսաստան բուժման մեկնած զինծառայող Աշոտ Գրիգորյանն այսօր՝ հունիսի 29-ին, վիրահատվել է: Պաշտպանության նախարարի մամուլի խոսնակ Արծրուն Հովհաննիսյանն իր ֆեյսբուքյան էջում գրել է, որ իրեն այդ մասին տեղեկացրել է Աշոտի քույրը:
«Այսօր ՌԴ-ում` Սանկտ Պետերբուրգում Աշոտին վիրահատել են։ Վիրահատությունը անցել է առանց խնդիրների»,- գրել է նախարարի մամուլի խոսնակը:
Նշենք, որ 2014թ մարտական հենակետում աջ արմնկային հոդի վիրավորում ստացած Աշոտ Գրիգորյանի բուժման համար մայիսին Կառավարությունը որոշում էր կայացրել գումար հատկացնել:
Ինչպես ավելի վաղ հայտնել էր NEWS.am-ը, 2014թ. մայիսի 26-ին ղարաբաղա-ադրբեջանական հակամարտ զորքերի շփման գծի հարավային (Ֆիզուլի) ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից արձակված գնդակից աջ ձեռքի շրջանում միջին ծանրության հրազենային վիրավորում էր ստացել զինծառայող, 1994թ. ծնված Աշոտ Ալիկի Գրիգորյանը: