«Ես այլ՝ ամբողջական տեղեկություն ունեմ, որ Ստյոպա Սարֆարյանն ու ՕԵԿ ղեկավարությունը այդ օրը «Յարխուշտա» եւ «Սարի սիրուն իմ յար ջան» են պարել, ու նմանատիպ այլ պարեր»,-նոյեմբերի 30-ին հրավիրված ասուլիսում կատակի տոնով հայտարարեց ԱԺ «Ժառանգություն» խմբակցության պատգամավոր Արմեն Մարտիրոսյանը՝ անդրադառնալով մամուլում տեղ գտած հրապարակմանը, ըստ որի խմբակցության ղեկավար Ստեփան Սաֆարյանին «վերբովկա» են անում՝ առաջարկելով անդամագրվել ՕԵԿ-ին եւ այդ նպատակով մի քանի օր առաջ նա հրավիրվել է «Շիրակ» ռեստորան:
Մարտիրոսյանը հիշեցրեց, որ Ստյոպա Սաֆարյանի՝ «վերբովկա» լինելու մասին կեղծ տեղեկությունները նոր չէ, որ դրվել են շրջանառության մեջ: «Շատ հետաքրքիր է քաղաքական զիգզագները՝ Սաֆարյանի ՕԵԿ-ում հայտնվելու հետ կապված. ՀԱԿ-ից սկսեց, ու ոնց որ թե շարունակում է «Օրինաց»-ով»,-հայտարարեց Մարտիրոսյանը՝ հավելելով. «Իրականում սա հերյուրանք է: Այսօր առավոտյան ես հանդիպել եմ Սաֆարյանին, ինքը բավականին լավ տրամադրության մեջ էր»: Ըստ Մարտիրոսյանի՝ խմբակցության անդամները բավական երկար ճանապարհ են անցել «եւ քաղաքական տարաձայնություններ էլ այս թիմում գոյություն չունեն»:
NEWS.am-ի հարցին, թե չե՞ք բացառում, որ նման լուրերը հենց ՕԵԿ-ն է դնում շրջանառության մեջ, Մարտիրոսյանը պատասխանեց. «Չեմ կարծում, որ ՕԵԿ-ին սա լավ դրության մեջ դնի: Այս հրապարակումով կարծես հարված է հասցվում նաեւ հենց ՕԵԿ-ին այն առումով, որ ՕԵԿ-ը կադրերի հսկայական պակաս ունի եւ այստեղից այնտեղից փորձում է կադրեր հավաքել»: Պատգամավորի կարծիքով՝ նման լուրերի տարածման հեղինակները նրանք են, ովքեր խնդիր ունեն հեղինակազրկել «Ժառանգությանը»: