ԱՊՀ անդամ պետությունները ծրագրում են ահաբեկչական գործունեությանն առնչություն ունեցող անձանց ցուցակներ փոխանակել եւ տվյալների ընդհանուր բազա ստեղծել: ՌԻԱ Նովոստիի փոխանցմամբ՝ այս մասին հաղորդել է Ղրղզստանի կառավարությանն առընթեր ֆինանսական հետախուզության պետական ծառայության ներկայացուցիչ Չինգիզ Կենենբաեւը:
«Ահաբեկչության դեմ պայքարի միջազգային համագործակցության շրջանակում լուրջ քայլեր են արվել: Նախատեսում ենք, որ պետությունները կարող են ճանաչել ահաբեկիչների ցուցակները, որպեսզի ԱՊՀ տարածքում կարողանանք միավորել ջանքերը՝ հանցագործության այդ տեսակի դեմ պայքարելու համար»,- ասել է ղրղզական կառավարության ներկայացուցիչը:
Նա նշել է, որ ցուցակների ճանաչումը կարող է իրականացվել երկկողմ եւ բազմակողմ պայմանագրերի կնքման ճանապարհով, եւ ներկայացրել Ղրղզստանի եւ Ռուսաստանի օրինակը, որոնք արդեն նման տեղեկատվություն են փոխանակում: