Թուրքիայի Ազգային մեծ ժողովն ընդունել է Մեջլիսի ներքին կանոնակարգում փոփոխություններ նախատեսող օրենքների փաթեթը, որով այսուհետ արգելվելու է խորհրդարանի ամբիոնից բարձրաձայնել Հայոց ցեղասպանության մասին:
Այս մասին NEWS.am-ի հետ զրույցում նշել է «Ակոս» պարբերականի հայերեն բաժնի խմբագիր Բագրատ Էստուկյանը:
Նրա խոսքով, այս օրենքի հիմնական նպատակը խորհրդարանում իշխանություններին ոչ հաճելի ելույթ ունեցող պատգամավորների խոսքը սահմանափակելն է: «Թուրքիայի խորհրդարանում կան պատգամավորներ, որոնց ելույթներն անհանգստացնում են իշխող կուսակցությանը, պետության ղեկավարներին, որոնց ելույթները դեմ են իշխանության վարած քաղաքականությանը, օրինակ Կարո Փայլանի իրավապաշտպան ելույթները: Թուրքիայի քաղաքական մտքին հաճելի չեն նման ելույթները եւ իշխող «Արդարություն եւ զարգացում» կուսակցությունը՝ համագործակցելով ազգայնական կուսակցության հետ, ընդունեցին այս փոփոխությունները»,-ընդգծեց Էստուկյանը՝ հավելելով, որ հատկապես քրդական Ժողովուրդների ժողովրդական կուսակցության պատգամավորների դեմ է ուղղված այս նախաձեռնությունը, քանի որ նրանք են այդ թեմաներով ելույթներ ունենում:
Էստուկյանը հիշեցրեց, որ Թուրքիայի խորհրդարանի պատգամավոր, հայտնի քուրդ իրավապաշտպան Լեյլա Զանայի պատգամավորի երդումը չի ընդունվել եւ այս նոր փոփոխությունները հիմք ընդունելով նրան կարող են զրկել պատգամավորի մանդատից, առնվազն նման մտադրություն ունեն: Նրա խոսքով, երդումը չընդունելու պատճառն այն է, որ Լեյլա Զանան իր երդման մեջ նշել էր, որ ոչ թե հավատարիմ պիտի լինի թուրք ազգին, այլ Թուրքիայի ազգերին:
Օրենքների փաթեթին կողմ են քվեարկել իշխող «Արդարություն և զարգացում» կուսակցությունը և դրա հետ համագործակցող «Ազգայնական շարժում» կուսակցությունը: Ընդդիմադիր քեմալական Հանրապետական ժողովրդական կուսակցությունն ու քրդամետ Ժողովուրդների դեմոկրատական կուսակցությունը դեմ են քվեարկել փոփոխություններին:
Թուրքիայի մեջլիսում ընդունված օրենքների փաթեթը ենթադրում է տուգանք սահմանել այն պատգամավորների համար, որոնք կվիրավորեն «թուրք ազգի պատմությունն ու համատեղ անցյալը»: Որպես «վիրավորանք» են ընկալվելու «1915 թվականի դեպքերի մասին» խոսելիս «Հայոց ցեղասպանություն» եզրույթի կիրառումը: Արգելքը վերաբերելու է նաև մեջլիսի ամբիոնից «Քուրդիստան», «քրդական նահանգներ» եզրույթները հնչեցնելուն:
