«Սառույցի եւ կրակի երգ» սագայի հեղինակ Ջորջ Ռայմոնդ Ռիչարդ Մարթինը հայտնել է, թե ինչու է իր հերոսներին սպանում, փոխանցում է «Ինտերֆաքսը»:
«Նախկինում ես ընթերցող էի եւ ցանկանում էի հետաքրքիր գրքեր կարդալ: Սակայն դրանք գրեթե բոլորը առաջին գլխից սկսած կանխատեսելի էին, առաջին էջերից ինձ համար պարզ էր՝ ով է չարագործ, ով՝ ոչ, այնտեղ ոչ մի իրատեսական վտանգավորություն չկար»,- հայտարարել է գրողը, որը այցով Ռուսաստան է ժամանել:
Մարթինի խոսքով՝ ինքը ցանկանում էր այնպիսի գրքեր կարդալ, որոնց հերոսներն անսպասելի արկածների մեջ են հայտնվում, հետեւում են անկանխատեսելի ուղղությունների:
«Սա այն է, ինչ ես ուզում եմ, որ իմ ընթերցողները կարդան»,- պարզաբանել է գրողը: Նա հավելել է, որ նման նպատակին հասնելու միջոցներից մեկը գլխավոր հերոսներից մեկի անսպասելի սպանությունն է: Մարթինը որպես օրինակ նշել է «Սառույցի եւ կրակի երգի» առանցքային հերոսներից մեկի՝ Էդարդ Սթարքի մահը:
