Կատալոնիայի ոստիկանությունը Բարսելոնի ահաբեկչության հիմնական կասկածյալ է համարում 22-ամյա Յունես Աբույակուբին։ Այս մասին հաղորդում է «Մեդուզա»-ն՝ վկայակոչելով իսպանական լրատվամիջոցները։
Իրավապահները նախկինում ենթադրում էին, որ Բարսելոնի կենտրոնում անցորդներին վրաերթի է ենթարկել Մուսա Ուքաբիրը (17 տարեկան), սակայն Կատալոնիայի իրավապահ մարմինների ղեկավար Խոսե Լուիս Տրապերոն օգոստոսի 18-ի երեկոյան հայտարարեց, որ այդ տարբերակը քիչ հավանական է։ Ըստ նոր տարբերակի՝ վրաերթը կատարել է Յունես Աբույակուբը, որին հաջողվել է անհետանալ դեպքի վայրից։
Լրատվամիջոցների տվյալներով՝ Աբույակուբն ազատության մեջ մնացած ահաբեկչական խմբավորման միակ անդամն է, որն իրագործել է Բարսելոնի եւ Կամբրիլսի ահաբեկչությունները։
Տրապերոն ասել է նաեւ, որ քննչության կարծիքով ահաբեկիչները նախապես ցանկացել են պայթյուն կազմակերպել։ Ալկանարում պայթած տան տեղում ացետոնի երեքպերօքսիդ են հայտնաբերել՝ պայթուցիկ սարք, որը հաճախ են գործածում «Իսլամական պետության» ահաբեկիչները։
Ալկանարում չնախատեսված պայթյունի հետո, որի ժամանակ, համարվում է, որ խմբավորման երկու անդամ է զոհվել, ահաբեկիչները հարձակում գործելու այլ միջոց են գտել։