Հյուսիսային Կորեան չի ուզում միջուկային պատերազմ սկսել ու աշխարհը չի փորձում գահընկեց անել երկրի առաջնորդ Կիմ Չեն Ընին։ Այս մասին հայտնել է զինաթափման հարցերով ՄԱԿ գերագույն ներկայացուցիչը՝ Իձումի Նակամիցուն։
Նրա խոսքով՝ կա իրավիճակի խաղաղ լիցքաթափման հույս։ «Չեմ կարծում, թե ԿԺԴՀ-ն միջուկային պատերազմ է ուզում սկսել»,- ասել է նա Ժնեւում մամուլի ասուլիսի ժամանակ։ Նա հայտնել է, որ ՄԱԿ ներկայացուցիչները կապ են պահպանել բոլոր կողմերի հետ ու դրանցից ոչ մեկը, այդ թվում Հյուսիսային Կորեան, ճգնաժամի ռազմական լուծումը հնարավոր չի համարում։
«Դա չափից աղետալի է»,- ասել է նա։ «Ես կարծում եմ, որ մենք հասկանում ենք ռազմական էսկալացիայի հետեւանքները։ Ահա թե ինչու ենք շարունակում ասել ձեզ, որ դա չի կարող լուծում լինել»։
