Ամեն տարի «Ընդդեմ կանանց նկատմամբ բռնության» կոալիցիան Հոկտեմբերի 1-ը նշում է որպես «Ընտանեկան բռնության դեմ պայքարի ազգային օր»։ 2010թ. հոկտեմբերի 1-ին ամուսնու կողմից դաժան ծեծի հետեւանքով զոհվեց 20-ամյա Զարուհի Պետրոսյանը: Սա միակ դեպքը չէր Հայաստանում, սակայն իր դաժանությամբ ցնցեց հասարակությանը:
Այսօր՝ հոկտեմբերի 1-ին կոալիցիայի ակտիվիստները տարբեր ակցիաներ են իրականացնում Երեւանի տարածքում։ Մասնավորապես, ակցիաներ են կայացել Սասունցի Դավթի հրապարակում, Շենգավիթ մետրոյի հարակից տարածքում։
Նրանք պահանջում են տեղի ունեցած հանցագործությունների դեպքերով արդար դատավարություն, ընտանեկան բռնության դեպքերի կանխարգելում եւ օրենսդրական դաշտի կարգավորում։
Հայաստանում, ամեն տարի գրանցվում է ընտանեկան բռնության դեպքերի աճ։ Ըստ ՀՀ ոստիկանության 2017 թվականի առաջին յոթ ամիսների տվյալների գրանցվել է ընտանեկան բռնության 416 դեպք, որից 235-ը, այսինք շոշափելի մեծամասնությունը ամուսնու կողմից կնոջ նկատմամբ։ Իգական սեռի ներկայացուցիչների նկատմամբ բռնության դեպքերը 1204-ն են, որոնցից 52-ը սեռական անձեռնամխելիության եւ կանանց սեռական ազատության դեմ ուղղված։ «Ընդդեմ կանանց նկատմամբ բռության» կոալիցիայի տվյալներով նույն ժամանակահատվածում առնվազն 5 կին է սպանվել ամուսնու կամ զուգընկերոջ կողմից։ Իսկ անդամ կազմակերպությունների թեժ գծերին ստացվող հեռախոսազանգերի թիվը կրկնապատկվել է՝ անցնելով 4500-ը։
Այս տարի «Ընդդեմ կանանց նկատմամբ բռնության» կոալիցիան միջոցառումներն իրականացվում է ՝ «Ընտանեկան բռնությունը հանցագործություն է» խորագրով՝ նպատակ ունենալով բարձրացրել հանրային իրազեկվածությումը։
Միջոցառումները կկայանան նաեւ Մալաթիա-Սեբաստիա վարչական շրջանի այգու տարածքում, 15-րդ եւ 16-րդ թաղամասերի հատման կետում գտնվող տարածքում, իսկ երեկոյան «Ազատության» հրապարակում կայանալու է մոմավառություն՝ ի հիշատակ ընտանեկան բռնության զոհերի։
Լուսանկարները՝ Զարուհի Հովհաննիսյանի ֆեյսբուքյան էջից