Հայաստանում թույլ տեսողություն ունեցող մարդիկ օգտագործում են կարդալու ցանկացած հնարավորություն, սովորում են շփվել աշխարհի հետ։ Այս մասին ասել է հաշմանդամների «Ֆորտե» միության ակտիվիստ Սիփան Ասատրյանը՝ ելույթ ունենալով ArmIGF – 2017 համաժողովում։
Նրա խոսքով՝ դրա համար մի քանի տարի առաջ ինքն ու իր ընկերները ստեղծել էին «Մենք» ռադիոն։ Այն հեռարձակում է պատմություններ եւ հարցազրույցներ է վարում տեսողական խնդիրներով մարդկանց դժվարությունները հաղթահարելու մասին։ Խոսում են ամեն ինչից՝ Անդրեա Բոչելիի անցած ուղուց մինչեւ Պարալիմպիկ խաղեր։ «Մենք ուզում ենք, որ մեր ունկնդիրները եւ մյուսները իմանան, որ մենք ոչ թե պարզապես հաշմանդամներ ենք, որոնք անընդհատ օգնության են սպասում, այլ ուզում ենք ապրել եւ աշխատել բոլորի պես։ Մենք հեռարձակում ենք հենց այդպիսի հաղորդումներ»,– նշեց Ասատրյանը։
Հաղորդումների արխիվը՝ radio-menq.am կայքում։
