HBO ալիքը «խենթ» միջոցների կդիմի «Գահերի խաղը» սերիալի վերջին եթերաշրջանի անվտանգության ապահովման համար, հաղորդում է Forbes-ը։
Ֆենթեզի շոուն բազմիցս է տուժել արտահոսքից, եւ նախավերջին եթերաշրջանը դրա վառ օրինակներից մեկն է: Մասնավորապես, համացանցում էին հայտնվել սերիալի երկու էպիզոդ եւ բավականին ճշգրիտ տեղեկատվություն սյուժեի մասին։
Ըստ առկա տվյալների՝ վերջին վեց սերիաների սցենարները «կողպված» են պահվում, իսկ դերասանները կարող են տեքստին ծանոթանալ միայն «Գահերի խաղի» Բելֆաստի ստուդիայում:
Ենթադրվում է, որ սցենարի թվային տարբերակը բացելու համար անհրաժեշտ է հատուկ թույլտվություն ունենալ։ Պարզ չէ թե համակարգը, որտեղ պահվում են այդ նյութերը, միացված է համացանցին, թե՝ ոչ։
Տեղեկատվական արտահոսքից խուսափելու եւս մեկ մեթոդ է պայքարը պապարացիների դեմ, որոնք կարող են թափանցել նկարահանման հրապարակ կամ այնտեղ անօդաչու սարքեր ուղարկել։ Դրա համար նախատեսվում է կեղծ սցենարներ նկարահանել։
«Գահերի խաղի» աստղ Նիկոլայ Կոստեր Վալդաուն ծիծաղել է նման լուրերի վրա, նշելով, որ նման աշխատանքը շատ թանկ կարժենա։