ՆԱՏՕ–ի Խորհրդարանական վեհաժողովում ադրբեջանցի պատգամավորները փորձել են տարածքային ամբողջականության սկզբունքն ամրագրել հակամարտությունների լուծման մեջ, սակայն նրանց դա չի հաջողվել։ Այս մասին հոկտեմբերի 17-ին՝ մամուլի ասուլիսի ժամանակ, ասել է ՆԱՏՕ–ի ԽՎ–ում հայաստանյան պատվիրակության ղեկավար Կորյուն Նահապետյանը։
Ադրբեջանի պատվիրակությունը չի հրաժարվում հակահայկական քարոզչության փորձերից։ Սակայն ամեն դեպքում նման փորձերը հավասարակշռված պատասխան են ստացել, հավելել է Նահապետյանը։
Այսպես, օրինակ, Սեւծովյան տարածաշրջանում կայունության խնդրի քննարկման ժամանակ ադրբեջանական կողմը առաջարկել է զեկույցի նախագծում իր ձեւակերպումը. Սեւծովյան տարածաշրջանի երկրներում բոլոր հակամարտությունները պետք է լուծվեն տարածքային ամբողջականության հիմքի վրա։
Ընդ որում, թեպետ զեկույցը վերաբերում էր միայն Սեւ ծովի ափի երկրներին, Ադրբեջանն այն առաջարկում էր ընդլայնել նաեւ Սեւծովյան տարածաշրջանի համար։
«Մենք նշեցինք, որ ՆԱՏՕ–ն հավասարապես պաշտպանում է Հարավային Կովկասի բոլոր երկրների տարածքային ամբողջականությունը, եւ նման բնույթի առանձին ձեւակերպումները ոչ մի իմաստ չունեն։ Զեկուցող Ուիլլա Շմիդթը ընդունեց այդ դիտարկումը»,– ասել է Նահապետյանը։