«Ջավախք» հայրենակցական միության նախագահ, ԱԺ պատգամավոր Շիրակ Թորոսյանն այսօր, դեկտեմբերի 15-ին, լրագրողների հետ հանդիպմանն ասաց, որ Վրաստանի իշխանությունները Ջավախքի հիմնախնդիրները կոծկելու համար դիմում են քաղաքական բլեֆի: Նրանք, Շիրակ Թորոսյանի խոսքով, լրագրողներ են գործուղում Ջավախք, ովքեր այնտեղ հարցազրույցներ են անցկացնում եւ հետո այդ հարցազրույցները ուղղորդված տեսանկյունից հրատարակում են վրացական մամուլում:
Շիրակ Թորոսյանը մասնավորապես նկատի ունի վերջերս վրացական «Պիրվելի» պարբերականում տպագրված եւ NEWS.am-ում թարգմանաբար արտատպված «Կովկասյան ավանդույթներ» կարծրատիպի խախտումը Ախալքալաքի կանայք սխալ են համարում» հոդվածը: Այստեղ նշվում է. «Ախալքալաքի հեռու գյուղերում կանանց սոցիալական կարգավիճակը շատ ծանր է, քանի որ նրանք բացի տնային աշխատանքներից ստիպված են նաեւ տղամարդու աշխատանք կատարել, քանի որ տղամարդիկ հիմնականում գտնվում են Ռուսաստանում` հացի փող վաստակելու նպատակով: Ախալքալաքում բնակվող կանանց մեծամասնությունն արդեն համակերպվել է նման կյանքի հետ: Նրանք բողոքում են իրենց ծանր կյանքից, բայց ոչ մեկին չեն մեղադրում, ամեն ինչ կապում են կովկասյան ավանդույթների հետ»:
Ի պատասխան այդ հրապարական, Շիրակ Թորոսյանն ասաց. «Ջավախքում, ինչպես Հայաստանի ցանկացած մարզում, կանայք բոլորն էլ տղամարդկանց իրավահավասար են, բոլորը շատ լավ պատկերացնում են կյանքը, քաղաքականությունը, դժվարությունները»:
Վերջում Թորոսյանը հավելեց, որ վրացական իշխանություններն այսկերպ փորձում են ուշադրությունը շեղել խնդրի իսկական պատճառներից:
