Միխայիլ Սաակաշվիլիի կողմնակիցները փորձում են ներխուժել Կիեւի Պեչերսկի շրջանային դատարան, որտեղ պետք է տեղի ունենա նրա խափանման միջոցի ընտրության հարցով դատական նիստը, հայտնում է «112 Украина»-ն:
«Սաակաշվիլիի որոշ կողմնակիցներ փորձում են դատարան մտնել, նրանց թույլ չեն տալիս, այստեղ առայժմ քաշքշուկ է, ինչ-որ մեկն արդեն սկսում է քարեր նետել, ծխագալանիկների պայթյուններ ենք լսում»,- հայտնել է հեռուստաալիքի թղթակիցը:
Դատարան մտնել ցանկացողների մեջ է նաեւ Դավիդ Սաքվարելիձեն:
Թղթակցի փոխանցմամբ՝ դրանից հետո պայթյուն է լսվել, որից անմիջապես հետո օդը ծխով էր ծածկված եւ որոշ ժամանակ տեսանելությունը վատացել էր: Այնուհետեւ մոտեցել են սաղավարտավոր ոստիկանների օժանդակ ուժերը: Սաակաշվիլիի կողմնակիցներին հանդարտության կոչ են արել: Հիմա իրավիճակը կայունացել է:
Բախումից առաջ Դավիդ Սաքվարելիձեն փորձել է մոտենալ Պեչերսկի դատարանի մուտքին, սակայն նրան կամարին մոտ չեն թողել:
