ՄԱԿ-ի անվտանգության խորհուրդը դեկտեմբերի 18-ին նախատեսում է քննարկել Երուսաղեմի շուրջ ստեղծված իրավիճակը։ Մասնավորապես, խոսքը բանաձեւի նախագծի մասին է, որն անվավեր է ճանաչում քաղաքի ներկա կարգավիճակը փոփոխությունը եւ պատասխան է ԱՄՆ կողմից Երուսաղեմը որպես Իսրայելի մայրաքաղաք ճանաչելու որոշմանը, հաղորդում «ՌԻԱ նովոստին»։
ՄԱԿ-ում դիվանագիտական աղբյուրը հայտնել է, որ փաստաթուղթը պատրաստել է Պաղեստինը, իսկ օրակարգում ընդգրկել է Եգիպտոսը։ Նշվում է, որ Եգիպտոսի պատվիրակությունը դեռեւս պաշտոնապես չի առաջարկել ՄԱԿ-ի ԱԽ առաջիկա նիստում քվեարկություն անցկացնել։
Գործակալության փոխանցմամբ, բանաձեւի նախագծում ասվում է. «Ցանկացած գործողություն ու որոշում, որոնք ենթադրում են սուրբ քաղաք Երուսաղեմի կարգավիճակը, բնույթը եւ ժողովրդագրական կազմը, չունեն իրավաբանական ուժ, անվավեր են եւ պետք է չեղարկվեն ՄԱԿ-ի ԱԽ բանաձեւերի համաձայն»։
ՄԱԿ-ում Իսրայելի մշտական ներկայացուցիչ Դանի Դանոնը դատապարտել է Անվտանգության խորհրդում տարածված բանաձեւի նախագիծը։ «Ոչ քվեարկությունը, ոչ քննարկումները չեն փոխի պարզ իրողությունը, որ Երուսաղեմը միշտ եղել է եւ կլինի Իսրայելի մայրաքաղաքը։ Մեր դաշնակիցների հետ միասին մենք կշարունակենք պայքարել պատմական ճշմարտության համար»,-հայտարարել են ՄԱԿ-ում Իսրայելի մշտական ներկայացուցչությունում։
Հիշեցնենք, որ դեկտեմբերի 6-ին ԱՄՆ նախագահ Դոնալդ Թրամփը հայտարարել է Երուսաղեմը որպես Իսրայելի մայրաքաղաք ճանաչելու եւ ԱՄՆ դեսպանատունն այնտեղ տեղափոխելու մտադրության մասին։