Թալիշ գյուղը 2016 թվականի ապրիլյան դեպքերի ժամանակ չի տուժել այնքան, որքան ներկայացվել էր ավելի վաղ: Այս մասին հունվարի 15-ին հայտարարեց «Թալիշ-սահմանամերձ բնակավայրեր» հայրենասիրական կազմակերպության նախագահ Էդուարդ Պոլատովը:
Նրա խոսքով՝ 2016 թվականի ապրիլյան դեպքերի ընթացքում Թալիշ գյուղում 15-20 տուն եւ վարչական շենք էր վնասվել: «Սփյուռքը այնքան գումար էր փոխանցում, որ հնարավոր էր մի ամբողջ մեծ քաղաք կառուցել, ոչ թե՝ մի գյուղ», - ընդգծեց Պոլատովը` հավելելով, որ միջոցները կարող էին տրամադրվել նաեւ հենց տուժած գյուղացիներին:
Ինչպես նշեց կազմակերպության նախագահը, նրանք ցանկանում են սեփական ուժերով եւ ներդրողների աջակցությամբ մի փոքրիկ բնակավայր կառուցել Թալիշի մոտակայքում, որտեղ կամավորներ եւ ղարաբաղյան պատերազմի մասնակիցներ կտեղակայվեն: Նրանց նպատակը կլինի Թալիշի, նրա բնակիչների եւ շրջակա տարածքի անմիջական անվտանգության ապահովումը: Ընդ որում, պատերազմի մասնակիցները մշտական բնակություն կհաստատեն այնտեղ:
Բացի այդ, Էդուարդ Պոլատովը հավաստիացրեց, որ ռազմականացված բնակավայր տեղափոխվելու ցանկություն են հայտնել ոչ միայն պատերազմի մասնակիցները, այլ նաեւ՝ հասարակ քաղաքացիներ: Սակայն երբ նրանք գրել են ՀՀ վարչապետին, հայտնի է դարձել, որ գաղափարը ներկայացվել է Լեռնային Ղարաբաղի Հանրապետության կառավարության հաստատմանը: Այդ ժամանակից ի վեր ոչինչ չի արվել: «Ինչու՞ են նրանք այդ առաջարկը փոխանցել Ղարաբաղի վարչապետին: Նա մեզ բոլորից շատ է խանգարում: Ղարաբաղում մեզ աջակցում են միայն Բակո Սահակյանն ու Վիտալի Բալասանյանը»,- դժգոհեց Էդուարդ Պոլատովը:
