Թբիլիսիի քաղաքային դատարանը թմրանյութերի գործով մեղավոր է ճանաչել «Բախալա» մականունով հայտնի դերասան եւ հեռուստահաղորդավար Գեորգի Գիորգանաշվիլիին, հաղորդում է «Նովոստի-Գրուզիան»:
Այսօր նա 8 տարվա ազատազրկման է դատապարտվել թմրամիջոցներ ապօրինի ձեռք բերելու, առանձնապես խոշոր չափերի թմրանյութեր պահելու համար:
Դատարանն իր որոշման մեջ նշել է, որ մեղադրյալը դատապարտվել է նվազագույն ժամկետով, քանի որ նախկինում դատապարտված չի եղել եւ վնաս չի պատճառել այլ անձանց:
Հրապարակված դատավճռից դժգոհ են եղել Գիորգանաշվիլիի ընկերները՝ Բեկա Ցիկարիշվիլին եւ Տորնիկե Բզիավան: Նրանցից մեկը վիրավորական արտահայտություն է արել դատարանի հասցեին, իսկ մյուսը աղյուս է նետել եւ կոտրել ապակին, որից հետո երկուսն էլ ձերբակալվել են:
Երիտասարդները «Սպիտակ աղմուկ» հասարակական շարժման ներկայացուցիչներ են, որոնք թմրանյութերի քաղաքականության մեղմացման համար են պայքարում: