Եթե քրեակատարողական հիմնարկը Աշոտ Պետրոսյանին նկարչական պարաագաներ չտրամադրի, ապա ես կդիմեմ մարդու իրավունքների եվրապական դատարան: Այս մասին այսօր՝ փետրվարի 1-ին, Երեւանի ընդհանուր իրավասության դատարանի Ավան եւ Նոր Նորքի նստավայրում հայտարարեց պաշտպան Հայկ Ալումյանը:
«Աշոտ Պետրոսյանի իրավունքները նաեւ քրեակատարողական հիմնարկում են խախտվում՝ չթույլատրելով, որ նա ստեղծագործի: Եթե դա հաշվեհարդար է, թող ասեն, որ դա հաշվերհարդար է, հակառակ դեպքում, անձն ունի ստեղծագործելու իրավունք, ինչո՞ւ է խախտվում նրա այդ իրավունքը: Անձին իր գործիքները չտրամադրելը անհարգալից եւ արժանապատվությունը նվաստացնող վերաբերմունք , ինչն այս պահին պետությունը իրականացնում է Աշոտ Պետրոսյանի նկատմամբ, եթե այս իրավիճակը չուղղվի, ես այս հարցով կդիմեմ Եվրոպական դատարան»,- հայտարարեց պաշտպանը:
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի:
«Սասնա ծռեր» խմբի 11 անդամի մասով գործը քննում է Արտուշ Գաբրիելյանը, իսկ անջատված մասերով երկու գործը քննում են Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանն ու Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը:
