Ոչ ոք չի կարող կասկածի տակ դնել այն փաստը, որ Հայաստանի գործող նախագահ Սերժ Սարգսյանը Լեռնային ղարաբաղի հակամարտության կարգավորման բակացային գործընթացում անհամեմատ ավելի մեծ փորձ ունի, քան որեւէ մեկ ուրիշը, այդ թվում՝ ներկայիս վարչապետ Կարեն Կարապետյանը: Մարտի 13-ին լրագրողների հետ հանդիպման ժամանակ այսպիսի կարծիք հայտնեց հանրապետական պատգամավոր, ԱԺ Տնտեսական հարցերով մշտական հանձնաժողովի նախագահ Խոսրով Հարությունյանը:
Նրա խոսքով՝ Սերժ Սարգսյանն աննախադեպ փորձ ունի եւ միջազգային ատյաններում հուսալի գործընկերոջ հեղինակություն է վայելում, եւ այս գործոնները, անկասկած, ղարաբաղյան հակամարտության կարգավորման բանակցությունների սեղանի շուրջ հաշվի են առնվում: «Կարծում եմ՝ այս հարցում այլ կարծիք չի կարող լինել: Սերժ Սարգսյանի վարչապետությունն անհրաժեշտություն է՝ հաշվի առնելով ղարաբաղյան հակամարտության զարգացման ներկայիս միտումները»,- ասաց խորհրդարանականը: Նա նշեց, որ Կարեն Կարապետյանը գուցե կարողանա այս պարտականությունը կատարել, գուցե եւ չկարողանա: «Բայց արդյոք արժի՞ փորձարկման դիմել՝ հաշվի առնելով ղարաբաղյան հակամարտության կարգավորման այս փուլում բանակցային գործընթացի բացառիկ կարեւորությունը»,- հարց հնչեցրեց Խոսրով Հարությունյանը՝ բարեհաջող «մոռանալով», որ անցյալ տարի նախընտրական արշավի ժամանակ ՀՀԿ-ից միանշանակ հավաստիացնում էին, որ կուսակցության հաղթանակի դեպքում Կարեն Կարապետյանը վարչապետի պաշտոնում կմնա նաեւ 2018-ի ապրիլից հետո:
