Պաշտոնական այցով Լիբանանում գտնվող Կարեն Կարապետյանը տեղի գործարարներին փորձում է համոզել՝ ներդրումներ կատարել Հայաստանում: Լիբանանյան գործարար շրջանակների հետ հանդիպման ժամանակ վարչապետը ներկայացրել է, թե ինչու պետք է ներդրումներ անել հենց Հայաստանում եւ որ ոլորտներում:
Կարապետյանը գործարարներին «գայթակղել» է նաեւ բազմամիլիոնանոց շուկաներով, ուր հասանելիությունն ապահովված կլինի՝ ԵՏՄ-ին Հայաստանի անդամակցության եւ անցյալ տարեվերջին ստորագրված Հայաստան-Եվրամիություն համաձայնագրի շնորհիվ: Իսկ այցի ընթացքում Հայաստանի վարչապետը հանդիպել ու երկկողմ համագործակցության հարցեր է քննարկել նաեւ լիբանանցի պաշտոնակից Սաադ Հարիրիի, այդ երկրի նախագահի հետ: Կարեն Կարապետյանին ընդունել է նաեւ Մեծի Տանն Կիլիկիո Արամ Ա կաթողիկոսը:
Հրայր Թովմասյանը Սահմանադրական դատարանում կփոխարինի Գագիկ Հարությունյանին: Արա Բաբլոյանը Թովմասյանի թեկնածությունն առաջադրել է ՍԴ նախագահի պաշտոնում: Հրայր Թովմասյանը նաեւ Հանրապետական կուսակցության շարքերը լքելու դիմում է ներկայացրել: ՍԴ նախագահի ընտրությունները տեղի կունենան մարտի 20-23-ին կայանալիք ԱԺ հերթական նիստերի ժամանակ: Իսկ Սահմանադրական դատարանի նախագահ Գագիկ Հարությունյանի լիազորություններն արդեն դադարեցվել են. նա, հիշեցնենք, նորաստեղծ Բարձրագույն դատական խորհրդի նախագահ է ընտրվել:
ԱՄՆ-ում կադրային լուրջ փոփոխություններ են: Դոնալդ Թրամփն աշխատանքից ազատել է պետքարտուղար Ռեքս Թիլերսոնին: Նրա փոխարեն այդ պաշտոնը կզբաղեցնի Կենտրոնական հետախուզական վարչության (ԿՀՎ) տնօրեն Մայք Պոմպեոն: ԱՄՆ նախագահը վստահ է, որ Պոմպեոն «ֆանտաստիկ կաշխատի» նոր պաշտոնում:
Ռեքս Թիլերսոնն ամերիկյան արտաքին քաղաքական գերատեսչությունը ղեկավարում է 2017 թվականի հունվարից: Թրամփը նրան շնորհակալություն է հայտնել ծառայության համար, բայց չի նշել, թե որն է պաշտոնանկության պատճառը: Իսկ ոչ պաշտոնական աղբյուրները հաղորդում են, որ պատճառը Թրամփի եւ Թիլերսոնի միջեւ առկա տարաձայնություններն են: Ամերիկյան մի շարք պարբերականներ էլ պնդում են, թե բանավեճի ժամանակ Թիլերսոնը վկաների ներկայությամբ Թրամփին «գրողը տարած ապուշ» է անվանել: Արդեն հայտնի է նաեւ ԿՀՎ-ի նոր տնօրենի անունը. Թրամփն այս պաշտոնում նշանակել է Ջինա Հասփելին: Մինչ այդ նա զբաղեցրել է գերատեսչության ղեկավարի առաջին տեղակալի պաշտոնը:
Ռուսաստանի գլխավոր հետախուզական վարչության նախկին գնդապետ Սերգեյ Սկրիպալի եւ նրա դստեր թունավորման համար շարունակում են մեղադրանքներ հնչեցնել Ռուսաստանի հասցեին, որոնք Մոսկվան սադրանք է անվանում: ՌԴ ԱԳ նախարար Սերգեյ Լավրովն իր հերթին հայտարարել է, թե պաշտոնապես դիմել են բրիտանացիներին՝ թունավորման համար օգտագործված նյութին ծանոթանալու համար, որը, ըստ բրիտանական կողմի նախնական վարկածի, Ռուսաստանում է արտադրվել: Սակայն, ռուս պաշտոնյայի խոսքով, Լոնդոնից «անհասկանալի պատասխան է ստացվել, որը նշանակում է, որ հայտը մերժվել է»:
Մոսկվայում նաեւ կարծում են, որ մեղադրանքների նպատակը Ֆուտբոլի աշխարհի առաջնությունից առաջ, որն անցկացվելու է Ռուսաստանում, երկրի հանդեպ վստահությունը խաթարելու, նաեւ արեւմտյան պատժամիջոցները երկարաձգելու նպատակ ունեն: Նշենք, որ Սերգեյ եւ Յուլյա Սկրիպալներին ծանր վիճակում հայտնաբերվել եւ հոսպիտալացվել են մարտի 5-ին: Բրիտանական լրատվամիջոցների տեղեկություններով՝ նրանք թունավորվել էին: Սերգեյ Սկրիպալը Ռուսաստանում դատապարտվել է Մեծ Բրիտանիայի օգտին լրտեսության համար, իսկ 2010 թվականին նրան փոխանակել են ԱՄՆ-ում ձերբակալված ռուսական հետախուզական բջջի անդամների հետ:
«Մինի Բասկոնիա» ընկերությունը շուկայից հետ է կանչել Lutik ապրանքանիշի մարինացված վարունգի խմբաքանակը: Մեկ ամսվա ընթացքում արդեն երկրորդ անգամ Lutik-ի վարունգներում սպիտակ որդեր են հայտնաբերվել: Լուսանկարն արագորեն տարածվեց համացանցում եւ աղմուկ բարձրացրեց: Ընկերության ներկայացուցիչները կապվել են որդերը հայտնաբերած քաղաքացու հետ եւ արտադրանքն ուղարկել փորձաքննության: Այսօր արդեն «Մինի Բասկոնիա»-ն հայտնել է լաբորատոր փորձաքննության արդյունքները. պարզվում է՝ հայտնաբերվածը սեխի ճանճի թրթուրներ են: Այստեղ նաեւ փորձել են արդարանալ. նման մեկ-երկու դեպք է եղել, բացի այդ՝ արտաքին զննությամբ հնարավոր չէ պարզել, որ վարունգներում թրթուրներ կան: Ներկրող ընկերության ղեկավարը նաեւ հուսադրել է. սպիտակ որդերն առողջության համար ոչ մի վտանգ չեն ներկայացնում:
Բեռլինում շարունակվում է Շախմատի աշխարհի չեմպիոնի հավակնորդների մրցաշարը: Երրորդ տուրից հետո միանձնյա առաջատարն աշխարհի նախկին չեմպիոն, ռուսաստանցի Վլադիմիր Կրամնիկն է: Կրամնիկին հավասարվելու հնարավորություն ունեին ամերիկացի Ֆաբիանո Կարուանան կամ ադրբեջանցի Շաքրիյար Մամեդյարովը, սակայն նրանց պարտիան ոչ ոքի է ավարտվել: Իսկ հայ գրոսմայստեր Լեւոն Արոնյանը ռուսաստանցի Սերգեյ Կարյակինի հետ կիսում է 6-7-րդ տեղերը: Մարտի 14-ին կայանալիք չորրորդ տուրում էլ Կարյակինն Արոնյանի մրցակիցը կլինի:
Չնայած այս արդյունքին՝ Արոնյանի մարզիչ Աշոտ Նադանյանը բարձր է գնահատում հայ գրոսմայստերի հաղթանակի հնարավորությունը: Նշենք, որ չեմպիոնի հավակնորդների մրցաշարի հաղթողն իրավունք կստանա այս տարվա նոյեմբերի 9-28-ը Լոնդոնում կայանալիք մրցամարտում աշխարհի գործող չեմպիոն, նորվեգացի Մագնուս Կարլսենի հետ վիճարկել համաշխարհային թագը:
Մարտի 13-ին դոլարն ու ռուբլին փոքր-ինչ էժանացել են: Դոլարի փոխարժեքը կազմել է 480 դրամ, եվրոյինը՝ 592, ռուբլունը՝ 8 դրամ 44 լումա, ֆունտինը՝ 667 դրամ:
Մարտի 14-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +2+4, ցերեկը՝ +16+18 աստիճան տաքություն: