Ռուսաստանի նախագահական ընտրություններում Երեւանում ՌԴ դեսպանատան շենքում տեղակայված ըտրական տեղամասում քվեարկել է 4879 մարդ, փոխանցում է NEWS.am-ի թղթակիցը:
Երեւանում ՌԴ դեսպանատանը ձայների հաշվարկի ընթացքին հետեւել են ԱՊՀ Միջխորհրդարանական վեհաժողովի ներկայացուցիչները, ինչպես նաեւ ՌԴ Կոմունիստական կուսակցությունից առաջադրված թեկնաածու Պավել Գրուդինինի վստահված անձը:
Հարկ է նշել, որ Հայաստանում ՌԴ դեսպանատան համար գրանցվել է ընտրություններին աննախադեպ մասնակցություն: Հիշեցնենք, որ 2016 թվականին ՌԴ Պետական դումայի ընտրությունների ամբողջ օրը Երեւանում ՌԴ դեսպանատանը քվեարկել էր ընդամենը 1070 մարդ:
Մարտի 18-ին Ռուսաստանում ընդհանուր բացվել էր 97 հազարից ավելի ընտրական տեղամաս, որից 400-ը՝ արտասահմանում: Քվեարկության ընթացքին հետեւել են 109 երկրներից 1,5 հազար միջազգային դիտորդներ:
Հիշեցնենք, որ Ռուսաստանի նախագահի պաշտոնին հավակնում է 8 թեկնածու: Երկիրը 18 տարուց ավելի ղեկավարած Վլադիմիր Պուտինն առաջադրվում է նոր 6-ամյա ժամկետով: Նրա հիմնական մրցակիցն է Ռուսաստանի Դաշնության Կոմունիստական կուսակցությունից առաջադրված թեկնածու Պավել Գրուդինինը: Երկրի ղեկավարի պաշտոնին հավակնում է նաեւ ռուսական քաղաքական դաշտի հնաբնակ՝ Ռուսաստանի Լիբերալ-դեմոկրատական կուսակցության նախագահ Վլադիմիր Ժիրինովսկին, «Քաղաքացիական նախաձեռնության» թեկնածու Քսենյա Սոբչակը, «Յաբլոկո» կուսակցության ղեկավար Գրիգորի Յավլինսկին, երկրի տնտեսական օմբուդսմեն Բորիս Տիտովը, Ռուսական հասարակական միության ղեկավար Սերգեյ Բաբուրինը եւ ՌԴ Կոմունիստական կուսակցությունից անջատված «Ռուսաստանի կոմունիստների» թեկնածու Մաքսիմ Սուրայկինը:
