Եվրոպական հանձնաժողովի պատվիրակության` Հայաստան կատարած այցի շրջանակներում, ԱԺ պատգամավորների մասնակցությամբ սեպտեմբերի 15-ին Ազգային ժողովում տեղի ունեցավ սեմինար` քննարկելու «Արեւելյան գործընկերության» ծրագիրը:
ՀՀ ԱԺ հասարակայնության հետ կապերի վարչությունից NEWS.am-ին հայտնում են, որ «Արեւելյան գործընկերության» ծրագրի ԵՄ եւ վեց գործընկեր երկրների միջեւ հարաբերությունների ամրապնդման բաժնի ղեկավար Ջոն Քյաերը կարեւորել է Հայաստան-ԵՄ համագործակցության հստակեցմանը միտված այս սեմինարը եւ հավելել, որ նոր համագործակցության սկիզբը մայիսին Պրահայում տեղի ունեցած ԵՄ եւ «գործողությունների» շրջանակներում ընդգրկված երկրների մասնակցությամբ տեղի ունեցած գագաթնաժողովն է եղել: Նրա գնահատմամբ` համագործակցության արդյունավետ զարգացման երկու կարեւոր պայման կա. առաջին` Հայաստանի առանձնահատկությունների հաշվառումով պետք է լավ մշակված լինի ծրագիրը եւ երկրորդ` Եվրամիությունը հնարավորինս մեծ ռեսուրսներ պետք է ներգրավի այդ հարաբերությունների զարգացման նպատակով: Նրա տեղեկացմամբ` հայկական կողմը պատրաստակամ է` զարգացնելու այդ համագործակցությունը, իսկ Եվրամիությունն էլ ամեն ինչ կանի դրա կայացման համար:
Եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը, կարեւորելով երկկողմ հարաբերությունների հիմքում դրված գերակա ոլորտները, հավաստիացրեց, որ դրանց իրականացման համար մեր երկիրն ունի անհրաժեշտ կամք եւ վճռականություն: Նա նշեց, որ թեեւ վերջին տարիներին ՀՀ օրենսդրության` եվրոպական չափանիշներին համապատասխանեցման ուղղությամբ մեծ աշխատանքներ են կատարվել, բայց իշխանությունները շատ լավ գիտակցում են եվրաինտեգրման կարեւորությունը եւ դրան ուղղված նոր քայլեր կատարելու անհրաժեշտությունը:
Եվրոպացի փորձագետները պատասխանել են ԱԺ պատգամավորների հարցերին, որոնք վերաբերում էին նոր համաձայնագրի առանձնահատկություններին, մասնակից երկրներին բյուջետային հատկացումներին, վիզայի ռեժիմի ազատականացմանը եւ Եվրամիության ընդլայնման սկզբունքներին:
