Տնտեսական մրցակցության պաշտպանության պետական հանձնաժողովը (ՏՄՊՊՀ) մասնագիտական կառույց է, ուստի այն պետք է լինի ապաքաղաքական: Այս մասին, այսօր՝ մարտի 23-ին, ԱԺ-ում «Տնտեսական մրցակցության պաշտպանության մասին» ՀՀ օրենքում լրացումներ եւ փոփոխություններ կատարելու մասին» օրենքի նախագծի երկրորդ ընթերցմամբ քննարկման ժամանակ նշեց ՏՄՊՊՀ նախագահ Արտակ Շաբոյանը՝ անդրադառնալով ՀՅԴ-ի առաջարկին, որ ՏՄՊՊՀ անդամներից մեկի թեկնածությունը ներկայացնեն ընդդիմադիր պատգամավորները:
«Այս առաջարկը չի ընդունվել, քանի որ հանձնաժողովը մասնագիտական կառույց է, վարչական մարմին է համարվում եւ կարծում ենք, որ Հանձնաժողովը պետք է լինի ապաքաղաքական: մենք առաջարկում ենք պահպանել տարբերակը, որ բոլոր անդամների թեկնածությունը ներկայացվի վարչապետի կողմից ԱԺ-ին»,-ասաց Շաբոյանը:
«Մենք նախատեսում ենք, որ այն դեպքերում երբ տարբեր ապրանքային շուկաներում տնտեսվարողների կշիռը 20 տոկոսից ցածր է, այդ դեպքում՝ նրանց միջեւ պայմանավորվածությունները չհամարվեն հակամրցակցային: Առաջարկ է արվել դա հանել, բայց նախ դա ԵՏՄ կարգավորումներում է այդպես, նաեւ հիմնավորում է բերվել, որ եթե փոքր տնտեսվարողներ են, ապա մրցակցության տեսանկյունից ռիսկեր չի ներկայացնում»,-ընդգծեց Շաբոյանը:
Հաջորդ առաջարկը, ըստ նրա, վերաբերում է առեւտրային ցանցերին. «Եթե 4-ից ավելի օբյեկտներ կան, ապա ոչ միայնհիմք ընդունվի այդ օբյեկտների քանակը, այլ նաեւ առեւտրաշրջանառության ծավալը: Տրամաբանական է առաջարկը, բայց արդեն գործող օրենսդրությամբ դա նախատեսված է, նշվում է նաեւ, որ գերիշխող են այն առեւտրային ցանցերը, որոնք ունեն 1,5 մլրդ դրամից ավելի շրջանառություն»:
Ավելի վաղ NEWS.am-ը հայտնել էր, որ այս օրինագծով, ըստ ՏՄՊՊՀ նախագահ Արտակ Շաբոյանի, բարձրացվում է ՀՀ Մրցակցային մարմնի կարգավիճակը եւ օրենքում հստակ ամրագրվում է, որ Հանձնաժողովը հանդիսանում է անկախ ինքնավար մարմին:
Օրենսդրական փաթեթում վերանայվել են պատասխանատվության միջոցների կիրառման մեխանիզմները, դրանք արդիականացվել են եւ համապատասխանեցվել են միջազգային չափանիշներին:
«Հանձնաժողովի տեսադաշտ ենք բերում պետական պաշտոնյաների հակամրցակցային գործողությունները: Օրենքով արգելվում է պետական պաշտոնյաների կողմից հակամրցակցային գործունեության դրսեւորումը եւ հակամրցակցային իրավական ակտերի ընդունումը: Այս օրենսդրական փաթեթում մտցրել ենք նոր իրավական սահմանումներ՝ գների չհիմնավորված բարձրացում, գների չհիմնավորված նվազում, խտրական պայմանների կիրառում եւ այլն:
Բացի այդ, մրցակցության ոլորտում ավելացել են նոր իրավախախտման տեսակներ, մասնավորապես, տնտեսական գործունեության արգելված համակարգումը, ապրանքային նշանների օգտագործման միջոցով անբարեխիղճ մրցակցության դրսեւորումները եւ այլն»,-ընդգծել էր Շաբոյանը:
Նրա խոսքով, այս օրենսդրական փաթեթով ընդհանուր առմամբ ընդլայնվում է Հանձնաժողովի գործիքակազմը, ավելանում են նոր մեխանիզմներ եւ լիազորություններ, որոնք հնարավորություն կտան հակամրցակցային համաձայնությունները բացահայտել առավել արդյունավետ:
- Նոր օրինագիծ. նախատեսվում է սահմանել չհիմնավորված բարձր եւ ցածր գին, տուգանքները կլինեն տոկոսներով. Շաբոյան
- Նոր լիազորություններ եւ գործիքակազմ ՏՄՊՊՀ-ին. Օրենքն ԱԺ-ում 1-ին ընթերցմամբ ընդունվեց միաձայն
- Պետությունն իրավունք չունի գնագոյացում առաջացնել, նա պետք է մրցակցություն ապահովի. Զեյնալյանը՝ Շաբոյանին