Պետությունն իրավունք չունի գնագոյացում առաջացնել. եթե բարձր գին են սահմանել, պետք է պայմաններ ստեղծել, որ այլ տնտեսավարողներ մտնեն այդ ոլորտը եւ մրցակցություն ստեղծեն: Այս մասին, այսօր՝ մարտի 6-ին, ԱԺ-ում Տնտեսական մրցակցության պաշտպանության մասին» Հայաստանի Հանրապետության օրենքում լրացումներ եւ փոփոխություններ կատարելու մասին» օրինագծի քննարկման ժամանակ նշեց «Ելք» խմբակցության պատգամավոր Արտակ Զեյնալյանը՝ հավելելով, որ եթե ծայրահեղ մենաշնորհացված իրավիճակ է, պետք է տրոհել ընկերությունը, թող երկու մասի բաժանվի, որոնք իրար հետ կմրցակցեն:
Ի պատասխան ՏՄՊՊՀ նախագահ Արտակ Շաբոյանն ասաց, որ օրենքով չհիմնավորված բարձր գին եւ չհիմնավորված ցածր գին սահմանելը վերաբերում է միայն գերիշխող դիրք զբաղեցնող տնտեսվարողներին:
Ինչ վերաբերում է ընկերությունը տրոհելուն, Շաբոյանն ասաց. «Ամբողջ աշխարհում մրցակցության մարմինները չեն պայքարում խոշոր ընկերությունների դեմ, պայքարում են միայն խոշոր ընկերությունների չարաշահումների դեմ: Չենք կարծում, որ տրոհելը ճիշտ լուծում է, դա ոչ մի արդյունք չի տա: Ի վերջո, ընկերությունը կարող է իր գործունեությունն իրականացնել մի քանի ընկերությունների միջոցով»:
