Բելառուսի նախագահ Ալեքսանդր Լուկաշենկոյին դուր չեն գալիս ռուսական սերիալները։ Նրա կարծիքով՝ բելառուսներն ավելի լավ սերիալներ կարող են նկարահանել։
Բելառուսի պետական խոշոր լրատվամիջոցների ղեկավարների ու անձնակազմի հետ հանդիպման ժամանակ Լուկաշենկոն հայտարարել է, որ բելառուսական ալիքները պետք է հեռարձակեն սեփական, ոչ թե օտարերկրյա հաղորդումներ, փոխանցում է «ԲԵԼՏԱ»-ն։
«Հարթակները պետք է բելառուսական լինեն։ Սա չի նշանակում, որ մենք Էռնեստին (ռուսական «Առաջին ալիքի» գլխավոր տնօրեն Կոնստանտին Էռնեստ) վատ ենք վերաբերվում, ո՛չ։ Նա նորմալ, ստեղծագործ, լավ մարդ է։ Բայց սա պետք է մերը լինի»,-ասել է երկրի նախագահը։
Նա օրինակ է բերել ռուսական սերիալները, որոնցից շատերը, նրա կարծիքով, այնքան էլ լավ որակի չեն։ Նա վստահ է, որ Բելառուսի հեռուստաալիքները եւ ռեժիսորները ունակ են լավ հեռուստասերիալներ նկարահանել եւ ռուսականի փոխարեն հեռարձակել եթերում։