Միջազգային հանրության շրջանում համաձայնություն կա բանակցային գործընթացին Արցախի անմիջական մասնակցության վերաբերյալ: Այս մասին diyarchitect.ru-ին տված հարցազրույցում հայտարարել է Արցախի արտաքին գործերի նախարար Մասիս Մայիլյանը:
«Լիարժեք ձեւաչափով բանակցությունների բացակայությունն Ադրբեջանի ղեկավարության կողմից հակամարտության վերջնական լուծմանը հասնելու համար քաղաքական կամքի բացակայության արդյունք է: Խոչընդոտելով Արցախի անմիջական եւ լիարժեք մասնակցությամբ եռակողմ բանակցությունների վերսկսմանը, հրաժարվելով հրադադարի ամրապնդման համար խաղաղապահ գործողությունների իրականացումից, շարունակելով հակամարտությունը սրելու հետեւողական քաղաքականությունը՝ Ադրբեջանը կանխամտածված կերպով ձգձգում է երկարատեւ խաղաղության հաստատումը տարածաշրջանում»,- հայտարարել է նախարարը:
Նրա խոսքերով, չնայած միջազգային այլ հարցերի շուրջ տարաձայնություններին՝ ադրբեջանա-ղարաբաղյան հակամարտության կարգավորման հարցում միջնորդ պետությունները հանդես են գալիս միասնական դիրքորոշումից եւ համակարգում են միջնորդական ջանքերը վերջնական կարգավորման հասնելու համար: «ԵԱՀԿ Մինսկի խմբի համանախագահությունը ներկայացված՝ ի դեմս ԱՄՆ-ի, Ռուսաստանի եւ Ֆրանսիայի, ադրբեջանա-ղարաբաղյան հակամարտության կարգավորման գործում միջնորդության միջազգային մանդատ ունեցող միակն համաձայնեցված ձեւաչափն է:
Հուսանք, որ ԵԱՀԿ Մինսկի խմբի համանախագահ երկրների միջեւ լարվածության նոր փուլը բացասաբար չի անդրադառնա ղարաբաղյան հակամարտության կարգավորման գործընթացի վրա: Հնարավոր է, որ «Մինսկի հարթակն» օգտագործվի նաեւ Ռուսաստանի եւ Արեւմուտքի միջեւ երկխոսություն հաստատելու համար»,- նշել է Մասիս Մայիլյանը: