Ուկրաինական «Մայդանի» կամ այդ կարգի որեւէ այլ իրադարձությունների հետ համեմատությունը պարզ թյուրըմբռնում է: Այս մասին, այսօր՝ ապրիլի 27-ին, «Մարիոթ» հյուրանոցում հայտարարեց ԱԺ «Ելք» խմբակցության պատգամավոր, «Իմ քայլը» նախաձեռնության առաջնորդ Նիկոլ Փաշինյանը:
Նա նկատեց, որ Հայաստանում տեղի ունեցող իրադարձությունները, ողջ գործընթացը սաղմնային վիճակից բոլորի աչքի առաջ է եղել. «Դա այնքան ակնհայտ է, որ անգամ չարժե դրա մասին խոսել: Այս պրոցեսը սկզբից մինչեւ վերջ, տեղի է ունեցել բոլորի աչքի առջեւ: Մեր ֆինանսական աղբյուրները նույնպես 100 տոկոսով թափանցիկ են:
Բոլոր երկրների պետական մարմինները, բանկային համակարգը հնարավորություն ունեն ստուգել մեր կապերը: Պատրաստ են նրանց օգնել այդ հարցում: Սա մաքուր՝ 100 տոկոսով հայկական քաղաքական պրոցես է, եւ այստեղ մեկ լումա անգամ ներդրված չէ օտարերկրյա որեւէ կազմակերպությունից կամ պետությունից»,-ասաց Փաշինյանը:
Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:
Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել:
Արդեն երեկ՝ ապրիլի 26-ին, Փաշինյանը Կարեն Կարապետյանին կրկին հրավիրել էր ապրիլի 27-ին, ժամը 12-ին «Արմենիա Մարիոթ» հյուրանոցում՝ սկսելու բանակցությունների երկրորդ փուլը:
Վարչապետի պաշտոնակատար Կարեն Կարապետյանի մամուլի խոսնակ Արամ Արարատյաննն այսօր հայտարարել է, որ Կարեն Կարապետյանն անհեռանկարային է համարում Նիկոլ Փաշինյանի հետ «բանակցությունները»՝ մերժելով հանդիպումը:
