Խոստմանս համաձայն` վայր դրեցի իմ մանդատը: Այս մասին այսօր խորհրդարանում լրագրողների հետ զրույցում ասաց դաշնակցական Աղվան Վարդանյանը:
Լրագրողների դիտարկմանը, թե մանդատ վայր դնելը հակասահմանադրական է, նա արձագանքեց. «Դուք կարծում եք՝ ես դա չգիտե՞մ: Ես իմ ելույթի ժամանակ հայտարարել էի, որ եթե կուսակցությունս ցանկանա, ես պատրաստ եմ վայր դնել մանդատս»:
Հարցին՝ իրեն կուսակցությունից հեռացնելու շուրջ քննարկում կա՞, Վարդանյանը պատասխանեց. «Կուսակցության ընկերների հետ զրույց կունենանք, ըստ այդմ՝ դուք տեղեկություն կստանաք»:
Լրագրողները նաեւ հետաքրքրվեցին. չի՞ փոշմանել, որ ժողովրդին դեմ է գնացել: «Եթե կարդաք իմ ելույթը, այնտեղ ամեն ինչ ասված է. ժողովուրդը նաեւ ես եմ: Այդքան ասում եք` հայ ժողովուրդ, հայ ժողովուրդ, ժողովուրդը նաեւ ես եմ»,- արձագանքեց Վարդանյանը:
Անդրադառնալով մամուլում շահարկվող թեմային, թե մանկատան երեխաների համար բնակարաններ կառուցելու ծրագրի պատճառով իր դեմ կոմպրոմատներ կային, Վարդանյանն ասաց. «Մոռացե՛ք, այդ փողով պետությանը ոչ մի կոպեկի վնաս չի տրվել, եւ այդ զառացանքները վաղուց հերքվել են»:
