Արցախում հակառակորդի արձակած կրակոցից հրազենային վիրավորում է ստացել ժամկետային զինծառայող։ Նախօրեին ուշ երեկոյան Պաշտպանության բանակի հյուսիսային ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից հրազենային վիրավորում է ստացել ՊԲ զինծառայող, 20–ամյա Գևորգ Խաչատրյանը:
Զինծառայողը տեղափոխվել է զինվորական հոսպիտալ: Նրա վիճակը գնահատվում է ծանր: Դեպքի մանրամասները պարզելու համար կատարվում է քննություն:
Հուլիսի 1–ից Հայաստանի անապահով ընտանիքների համար կարող է 10 դրամով նվազել էլեկտրաէներգիայի սակագինը։ Այսպիսի հայտարարություն հնչեց կառավարության նիստում։ Ավելի ուշ լրագրողների հետ զրույցում էներգետիկայի եւ բնական պաշարների նախարար Արթուր Գրիգորյանը պարզաբանեց, որ խոսքը 110-120 հազար անապահով ընտանիքների մասին է։
Կառավարությունն իր այսօրվա որոշմամբ ամբողջացրեց Հայաստանի մարզպետների նշանակումների ցանկը։ Սյունիքի մարզպետ նշանակվեց Կարեն Համբարձումյանը, իսկ Արմավիրի մարզպետ՝ Գագիկ Միրիջանյանը։
Կառավարության որոշմամբ Մարտին Սարգսյանն այսօր ազատվել է կառավարությանն առընթեր անշարժ գույքի կադաստրի պետական կոմիտեի նախագահի պաշտոնից։ Մեկ այլ որոշմամբ՝ Նարեկ Սարգսյանն էլ ազատվել է կառավարությանն առընթեր քաղաքաշինության պետական կոմիտեի նախագահի պաշտոնից: Նշենք, որ Նարեկ Սարգսյանը մի քանի տարի զբաղեցրել է Երեւանի գլխավոր ճարտարապետի պաշտոնը, եւ նրա ճարտարապետական նախաձեռնությունները ոչ միանշանակ են ընդունվել հանրության կողմից։
Ստեփանակերտում հունիսի 1–ին տեղի ունեցած ծեծկռտուքի գործով մեղադրյալների թիվը հասավ 7–ի։ Այսօր մեղադրանք է առաջադրվել եւս երեք անձի: Նրանք մեղադրվում են դիտավորությամբ առողջությանը միջին ծանրության վնաս պատճառելու եւ խուլիգանություն կատարելու մեջ։ Նրանցից 2–ը ստորագրությամբ ազատ են արձակվել՝ հաշվի առնելով, որ նրանք ստացիոնար բուժում են ստանում, 3–րդը կալանավորվել է։։
«Սասնա ծռերի» անդամներին շարունակում են ազատ արձակել։ Այսօր դատավոր Արշակ Վարդանյանը որոշում է կայացրել փոխել Արամ Հակոբյանի ու Պավլիկ Մանուկյանի որդու՝ Արամ Մանուկյանի խափանման միջոց կալանավորումը: Արդեն ազատության մեջ Արամ Մանուկյանը պատրաստվում է բուժումներ ստանալ եւ շարունակել ուսումը:
61 տարեկանում ինքնասպան է եղել ամերիկացի հայտնի շեֆ-խոհարար Էնթոնի Բուրդենը։ Բուրդենն ինքնասպան է եղել Ֆրանսիայում, որտեղ աշխատում էր իր հաղորդման հերթական նկարահանումների վրա: Բուրդենի մարմինը հյուրանոցի համարում գտել է նրա մտերիմ ընկերը ֆրանսիացի հայտնի շեֆ-խոհարար Էրիկ Րիպերը։
Անցաց տարի Բուրդենը Սերժ Թանկյանի ուղեկցությամբ այցելել էր Հայաստան եւ Արցախ, որտեղ համտեսել էր տոլմա, ժենգյալով հաց, խորոված, թանապուր, խաշ եւ այլն։ Իր այցի տպավորությունները մայիսի 20-ին CNN-ը ցուցադրել էր Parts Unknown հաղորդման շրջանակներում։
Դոլարը, եվրոն ու ռուբլին էժանացել են: Դոլարի փոխարժեքը կազմել է 483.22 դրամ, եվրոն՝ 568.41 դրամ, բրիտանական ֆունտը՝ 648.24 դրամ, իսկ ռուսական ռուբլու փոխարժեքը կազմել է 7.70 դրամ:
Հայաստանի մարզերի մեծ մասում հունիսի 8–ին սպասվում է կարճատեւ անձրեւ եւ ամպրոպ: Որոշ վայրերում հնարավոր է կարկուտ: Երևանում ժամանակ առ ժամանակ կլինի անձրեւ եւ ամպրոպ: Գիշերը մայրաքաղաքում կլինի +14 +16, վաղը կեսօրին՝ +27 +29:
