Սինգապուրում Դոնալդ Թրամփի եւ Կիմ Չեն Ընի հանդիպումը իրավիճակը կրիտիկական կետից հեռացնում է, հայտարարել է Ռուսաստանի նախագահի մամուլի քարտուղար Դմիտրի Պեսկովը, փոխանցում է «ՌԻԱ Նովոստի»-ն:
Նա հավելել է, որ արդյունքները դեռ պետք է վերլուծել, սակայն անմիջական երկխոսության փաստն ինքնին հարկ է միայն ողջունել: «Նման հանդիպումները, ինչպիսին էլ լինեն արդյունքները, անկասկած, նպաստում են թերակղզում լարվածության լիցքաթափմանը, իրավիճակը կրիտիկական կետից հեռացնում են, որում գտնվում էին տառացիորեն դեռեւս մի քանի ամիս առաջ: Սա նույնպես չի կարող գոհունակություն չառաջացնել»,- ասել է Պեսկովը:
Նա նշել է, որ նման «բարդ պատմություններում» ճիշտ չէր լինի հույս ունենալ, որ միաժամանակ կլուծվեր երկար ժամանակ անլուծելի խնդիրների համալիրը:
Նա շեշտել է, որ գագաթնաժողովը հաստատում է ռուսական կողմի եւ Վլադիմիր Պուտինի ճշմարտացիությունը, որն ասում էր, թե Կորեական թերակղզու խնդիրների կարգավորման դիվանագիտական մեթոդներն այլընտրանք չունեն, իսկ միակ հնարավոր ճանապարհը ուղիղ երկխոսությունն է:
