Հայ ազգայնականների համախմբման (ՀԱՀ) խորհուրդն այսօր՝ հունվարի 25-ին հանդես է եկել հայտարարությամբ, դժգոհություն հայտնելով այն փաստի առնչությամբ, որ Երեւանի նոր քաղաքապետ Կարեն Կարապետյանը հրահանգել է ռուսերենի դասընթացներ կազմակերպել քաղաքապետարանի աշխատակիցների համար:
«Ըստ այդ հրահանգի, քաղաքապետարանի 26 աշխատակիցների, ներառյալ` վարչության պետերի, վարչությունների եւ քաղաքային տնտեսությունների գլխավոր ու առաջատար մասնագետների համար պարապմունքներն անցկացնելու են փորձառու մանկավարժներ, եւ դասընթացների տեւողությունը 3 ամիս է լինելու:
Ամեն բան այսպես հստակ էլ կավարտվեր, եթե մեզ չահազանգեին, որ նորանշանակ քաղաքապետը ներքին կարգով հայտնել է, թե ովքեր դասընթացներից հետո լավ չհանձնեցին քննությունները` կզրկվեն աշխատանքից:
Հայ ազգայնականների համախմբումը (ՀԱՀ) նախապես հայտարարում է, որ նման վարվելակերպի դեպքում անվարան կպահանջի քաղաքապետի հրաժարականը` որպես հայկական պետության թշնամու»,-նշում են հայ արիները:
Նրանք նշում են, որ Հայաստանում պետական լեզուն հայերենն է եւ որեւէ հայ պաշտոնյա պարտավոր չէ օտար լեզուների իմացությամբ «տեղավորվել» աշխատանքի:
«Հայ ազգայնականների համախմբումը ՀՀ իշխանություններին կոչ է անում զգոն լինել եւ թույլ չտալ, որ այս կամ այն պետական պաշտոնյան այս կամ այն օտար լեզվին պետական լեզվի կարգավիճակ շնորհի իր քիմքին հարիր:
Կոչ ենք անում նաեւ վերանայել «Լեզվի մասին» եւ «Հանրակրթության մասին» ՀՀ օրենքներում կատարված նոր փոփոխությունները` վերջ տալով այլալեզու կրթության եւ բազմալեզվության պառակտիչ ու ազգաքանդիչ քաղաքականությանը»,-հայտարարության մեջ արձանագրել են հայ արիները: