Գերմանիայի իրավապահ մարմինները ձերբակալել են «Ալ Քաիդա» ահաբեկչական խմբավորման նախկին պարագլուխ եւ «թիվ մեկ ահաբեկիչ» Ուսամա բեն Լադենի նախկին թիկնապահին՝ ոմն Սամի Ա.–ին։ Չի բացառվում, որ ձերբակալվածը կարտաքսվի Թունիս, հայտնում է Bild–ը։
Պարբերականի տվյալներով, 42-ամյա թունիսցին 2005 թվականից ապրել է Բոհում քաղաքում։ Դեռեւս ապրիլին Հյուսիսային Ռեյն–Վեսթֆալիա դաշնային հողի իշխանությունները նրան ներառել էին պոտենցիալ վտանագավոր անձանց ցուցակում։ Սակայն, արտաքսել նրան Գերմանիայից իշխանությունները չէին կարող, քանի որ Մյունսթերի բարձրագույն վարչական դատարանը վճռել էր, որ հայրենիք վերադառնալու պարագայում տղամարդը կարող է խոշտանգումների ենթարկվել։
Այժմ Ներգաղթի եւ փախստականների հարցերով դաշնային գերատեսչությունը հետ է կանչել Սամի Ա.–ին արտաքսելու անթույլատրելիության մասին որոշումը, որի հիմքում դատական վճիռն էր ընկած։ Սա ճանապարհ է բացում նրան արտաքսելու համար։ Տղամարդը ձերբակալվել էր, երբ ներկայացել էր ոստիկանություն, որտեղ նա պարբերաբար ներկայանում էր իրավապահ մարմինների կարգադրությամբ։