Հայ-ադրբեջանական սահմանի Նախիջեւանի ուղղությամբ հակառակորդի հերթական սադրանքը հայկական կողմի պատասխան գործողությունների է հանգեցրել: Երկու օր շարունակ ադրբեջանական զինված ուժերը փորձել են որոշ տեղամասերում դիրքային ամրապնդման ինժեներական աշխատանքներ իրականացնել: Հայկական կողմը պատասխան կրակ է բացել, ինչի արդյունքում հակառակորդի դիրքերից մեկն ամբողջությամբ այրվել է: Փոխհրաձգության ընթացքում հայ զինծառայող է վիրավորվել. պայմանագրային Վահագն Բաղդասարյանը, բարեբախտաբար, թեթեւ վիրավորում է ստացել:
Ադրբեջանցիները սադրանքի են դիմել նաեւ Արարատի մարզի ուղղությամբ. նրանք կրակոցներ են արձակել Զանգակատուն գյուղի հարեւանությամբ խոտածածկ տարածքներում բռնկված հրդեհը մարող հրշեջների, քաղաքացիների եւ զինվորների ուղղությամբ:
Մեկնարկել է 2018 թվականի ամառային զորակոչը. այսօր պարտադիր զինվորական ծառայության են մեկնել առաջին նորակոչիկները: Երիտասարդների մայրերը չեն կարողանում թաքցնել հուզմունքը, իսկ հայրերն ու պապիկները վերջին խորհուրդներն են տալիս հայրենիքի պաշտպաններին:
Զինված ուժերի գլխավոր շտաբի պետը վստահեցնում է՝ բանակը կարող է իր զինվորին ապահովել անհրաժեշտ ամեն ինչով: Իսկ թերությունների կամ ահազանգերի դեպքում Արտակ Դավթյանը հորդորում է անհապաղ տեղեկացնել իրենց: Արտակ Դավթյանը վստահեցնում է նաեւ, որ արտերկրում բնակվող մեծ թվով երիտասարդներ արդեն արձագանքել են վարչապետի կոչին. վերադարձել են Հայաստան ու պարտադիր զինծառայության են մեկնելու:
Ամուլսարի շուրջ ստեղծված իրավիճակը ոչ մի կերպ հանգուցալուծում չի ստանում: Չնայած պաշտոնյաների, այդ թվում՝ վարչապետի կոչերին՝ Ամուլսարի հանքի ճանապարհները փակած վայոցձորցիները վճռական են տրամադրված. պատրաստվում են բողոքի ակցիաները շարունակել այնքան ժամանակ, մինչեւ հանքը վերջնականապես փակվի:
Ակցիաներին միացած բնապահպան ակտիվիստները երեկ Երեւանից ավտոերթով հասել են Ջերմուկ, ճանապարհին ստորագրահավաք անցկացրել Վայոց ձորի բնակավայրերում: Ակցիայի մասնակիցները նշում են, որ հանքի շահագործման արդյունքում ծանր մետաղներն Արփա գետով Սեւանա լիճ են հասնելու, այնտեղից էլ Արարատյան դաշտ, ինչն անթույլատրելի են համարում: Նրանք նաեւ չեն հավատում շահագործումն անվտանգ դարձնելու՝ «Լիդիան Արմենիա»-ի խոստումներին: Ի դեպ՝ հանքի շահագործման արդյունքում շրջակա միջավայրին հասցվելիք վտանգների մասին ահազանգել են նաեւ միջազգային փորձագետները: Իսկ «Լիդիան Արմենիա»-ն արդեն վնասներն է հաշվարկում. ընկերության տնօրենի խոսքով՝ բողոքի ակցիաների պատճառով իրենք արդեն 3.5 միլիոն դոլարի վնաս են կրել: Ընկերությունը մտադիր է դատարան դիմել:
562 հազար դոլար՝ Գյումրիում տնակներում ապրողներին բնակարանով ապահովելու համար: Լոս Անջելեսում տեղի է ունեցել «Հայաստան» համահայկական հիմնադրամի ամենամյա դրամահավաքը Գյումրիի համար: Այս տարի այն 4-րդ անգամ էր անցկացվում: Հիմնադրամը նախատեսում է յուրաքանչյուր բնակարանի համար տրամադրել շուրջ 25 հազար դոլար: Հիմնադրամի հեռուստամարաթոն-դրամահավաքների արդյունքում անցած 3 տարիների ընթացքում 38 ընտանիք հրաժեշտ է տվել տնակային կյանքին, իր հերթին սպասում է ավելի քան 2.000 ընտանիք:
Հայտնի հայ աստղագետ Երվանդ Թերզյանը բացառիկ ծառայության համար արժանացել է NASA-ի մեդալին: Պարգեւատրման արարողությունն օգոստոսի 2-ին է: Սա, ի դեպ, NASA-ի կողմից շնորհվող ամենաբարձր մրցանակն է: Եգիպտոսում ծնված Երվանդ Թերզյանն ամերիկյան Քորնելի համալսարանի պրոֆեսոր է: Նա հայտնի է աստղերի էվոլյուցիայի եւ հեռավոր գալակտիկաների միջեւ գազային ջրածնի հայտնաբերման բնագավառում հետազոտությամբ: Երվանդ Թերզյանը Հայաստանի գիտությունների ազգային ակադեմիայի արտասահմանյան անդամ է, 235 գիտական աշխատանքի հեղինակ, 7 գրքերի խմբագիր:
Մահացել է սիրված երգչուհի, ՀՀ մշակույթի վաստակավոր գործիչ Նադեժդա Սարգսյանը. նա 63 տարեկան էր: Երգչուհին երկար ժամանակ պայքարում էր քաղցկեղի դեմ: Վերջին շրջանում Նադեժդա Սարգսյանը հիվանդանոցի վերակենդանացման բաժանմունքում էր: Երգչուհին «Հայեր» համույթի եւ մշակութային կենտրոնի գեղարվեստական ղեկավարն էր, «Դո-ռե-մի» մրցույթի եւ վոկալ ստուդիայի հիմնադիրն ու գեղարվեստական ղեկավարը: 2003 թվականից ղեկավարում էր Երեւանի մշակույթի պետական քոլեջը:
Սյունիքի մարզում ողբերգական ավտովթարը 4 մարդու կյանք է խլել: Երեւան-Մեղրի ավտոճանապարհին բախվել են ՎԱԶ 2107 եւ ԳԱԶ 53 մակնիշի մեքենաները: Պատահարի հետեւանքով զոհվել են ՎԱԶ 2107-ի 4 ուղեւորները՝ 37-ամյա Մելինե Ադունցը, ինչպես նաեւ 39-ամյա Մարինե Հարությունյանն ու նրա անչափահաս որդիները՝ 15-ամյա Գոռ եւ 10-ամյա Սերգեյ Դոլունցները: Մեքենայի վարորդն ու մյուս ուղեւորը՝ 9-ամյա Արման Դարբինյանը, մարմնական վնասվածքներով հիվանդանոց են տեղափոխվել: Փաստի առիթով քրեական գործ է հարուցվել:
Հայաստանի քաղաքացիների մասնակցությամբ մահվան ելքով վթար է տեղի ունեցել նաեւ Ռուսաստանում: Լիպեցկի մարզում «Hyundai Sonata» եւ «Volkswagen Passat» մակնիշների մեքենաների բախման հետեւանքով զոհվել են «Volkswagen»-ում գտնվող Հայաստանի 5 քաղաքացիներից 4-ը՝ ամուսիններ եւ նրանց 10 եւ 1 տարեկան երեխաները: Ընտանիքի մյուս երեխան՝ 8 տարեկան, տեղափոխվել է Լիպեցկի մարզային մանկական հիվանդանոց: Բուժհաստատությունից Հայաստանի դեսպանությանը տեղեկացրել են, որ երեխայի վիճակը ծայրահեղ ծանր է:
Հուլիսի 2-ին դոլարը փոքր-ինչ թանկացել է, եվրոն ու ռուբլին՝ էժանացել: Դոլարի փոխարժեքը կազմել է 482 դրամ, եվրոյինը՝ 561, ռուբլունը՝ 7 դրամ 69 լումա, ֆունտինը՝ 634 դրամ:
Հուլիսի 3-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Ուլրամանուշակագույն ճառագայթման ինդեքսը՝ 7: Երեւանում նույնպես վաղը տեղումներ չեն լինի: Մայրաքաղաքում գիշերը կդիտվի +23+25, ցերեկը՝ +39+41 աստիճան տաքություն: