Հետախուզում է հայտարարվել Ալեքսանդր Սարգսյանի որդու՝ Նարեկ Սարգսյանի եւ նրա թիկնապահի նկատմամբ: ԱԱԾ-ն տվյալներ է ունեցել, որ Արամի փողոցի շենքերից մեկի բնակարանում, որը պատկանում է 31-ամյա Նարեկ Սարգսյանին, առանձնապես խոշոր չափերով թմրանյութ եւ զենքեր կան: ԱԱԾ աշխատակիցները մի քանի օր շարունակ դարանակալել են նշված հասցեում, սակայն ի վերջո շենքից դուրս գալիս բերման են ենթարկել Սարգսյանի ընկերներին՝ Սերոբ Սահակյանին եւ Վլադիմիր Շահինյանցին: Իրավապահները պարզել են նաեւ, որ Սարգսյանն իր թիկնապահ Արտեմ Պետրոսյանի հետ Մոսկվայում է, որտեղից պատրաստվում է եվրոպական որեւէ երկիր մեկնել: Բերման ենթարկվածների մոտ գտնվող ճամպրուկներում, որը Սերոբ Սահակյանը պատրաստվում էր այլ վայր փոխադրել, ԱԱԾ-ականները հայտնաբերել եւ առգրավել են կոկաին եւ մեթամֆետամին տեսակի թմրամիջոցներ, 4 ատրճանակ, որոնցից մեկը՝ խլացուցիչով, փամփուշտներ, անհայտ ծագման հաբեր, թմրանյութ օգտագործելու նպատակի ծառայող այլ առարկաներ: Նարեկ Սարգսյանի հաշվառման վայրում ԱԱԾ-ն հայտնաբերել է նաեւ Մարտիրոս Սարյանի վրձնին պատկանող 14 գծանկար՝ շուրջ 280 հազար դոլար ընդհանուր արժողությամբ, 115 հազար դոլար, 27 հազար եվրո, թանկարժեք ժամացույցներ, բազմաթիվ ոսկյա մետաղադրամներ եւ զարդեր, որոնց ձեռքբերման օրինականությունը ստուգվում է:
ԱԱԾ-ն երեկ շուրջ 8 ժամ Սերժ Սարգսյանի եղբոր՝ Ալեքսանդր Սարգսյանի տանը գործողություններ իրականացնելուց հետո հեռացավ Սարգսյանի եւ նրա որդու՝ Հայկ Սարգսյանի հետ: Մինչեւ հիմա պաշտոնական որեւէ տեղեկություն չի հրապարակվել, թե ինչ են հայտնաբերել Սարգսյանների տանը, ինչպես նաեւ արդյո՞ք բերման են ենթարկել կամ ձերբակալել հայր եւ որդի Սարգսյաններին: Սոցցանցերի հրապարակումների համաձայն՝ Ալեքսանդր եւ Հայկ Սարգսյաններն ազատության մեջ են: Մինչ այդ, սակայն, Քննչական կոմիտեն վերսկսել է 2007 թվականի ապրիլին Երեւանի բնակիչ Դավիթ Սիմոնյանի հրազենային վնասվածք ստանալու դեպքի առիթով հարուցված գործի նախաքննությունը: Վերջինին սպանելու փորձի մեջ Հայկ Սարգսյանն է կասկածվում: Քննությունը նոր փաստական տվյալներ ունի, որ տուժողի ուղղությամբ կրակոց է արձակել հենց Հայկ Սարգսյանը: Նրան դատավարական կարգավիճակ է տրվել: Նախաքննությունը շարունակվում է։
Վարչապետ Նիկոլ Փաշինյանն այսօր աշխատանքային այցով Սյունիքի մարզում էր: Մեկ օրվա ընթացքում նա հասցրել է լինել Սիսիանում, Գորիսում, Մեղրիում, Ագարակում, Քաջարանում եւ Կապանում: Մի քանի համայնքներում նա հանդիպումներ է ունեցել ինչպես քաղաքացիների, այնպես էլ առանձին հանդիպումներ՝ համայնքային ղեկավարների հետ: Վաղը Նիկոլ Փաշինյանը կլինի Վայոց ձորում: Այստեղ առաջին հանդիպումը Ջերմուկում է, որտեղ վարչապետին, թերեւս, մեծ անհամբերությամբ են սպասում. Նիկոլ Փաշինյանը հանդիպելու է Ամուլսարի հանքի շահագործման դեմ պայքարող ցուցարարների հետ:
ԵԿՄ-ում այսօր միության ակտիվի նիստ է անցկացվել: Լրատվամիջոցներին նիստի մասին չէին տեղեկացրել, իսկ ավելի ուշ տարածված հաղորդագրությամբ ԵԿՄ-ից հայտնեցին, որ ավելի քան 200 երկրապահներ հավաքվել էին՝ քննարկելու ԵԿՄ-ում ստեղծված իրավիճակը, դիտարկելու միության կառուցվածքի վերաբերյալ առաջարկները, ԵԿՄ առաջիկա վարչության նիստի եւ արտահերթ համագումարի հետ կապված հարցեր: Նաեւ ԵԿՄ վարչության նախագահի հարց է քննարկվել. այդ պաշtոնում ներկայացրել են ԵԿՄ անդամ, ԱԺ պատգամավոր Արամ Սարգսյանի թեկնածությունը: Վերջինը չի մերժել. ասել է՝ իրավունք չունի չհամաձայնելու: Նիստի մասնակիցները նաեւ ԵԿՄ արտահերթ համագումար հրավիրելու հարցն են քննարկել: Արամ Սարգսյանի առաջարկով այն, հավանաբար, կգումարվի սեպտեմբերին:
Երեւանում տոնական մթնոլորտում նշվեց Սահմանադրության օրը: Տոնական միջոցառման մասնակից կուրսանտները Հայաստանի զինանշանով եւ հսկայական եռագույնով անցան մայրաքաղաքի կենտրոնական փողոցներով: Նշենք, որ Սահմանադրության օրը՝ Հանրապետության հիմնարար փաստաթղթի տոնը, ամեն տարի նշվում է հուլիսի 5-ին: Մի քանի տարի շարունակ այդ օրը նշվում է նաեւ որպես պետական խորհրդանիշերի օր:
Իսպանիայի ոստիկանությունն ու Ինտերպոլը հայտնել են կազմակերպված հանցավորության ցանցի ոչնչացման մասին. այն Կովկասից մինչեւ Իսպանիա ու Ֆրանսիա էր ձգվում: Ինտերպոլը հայտարարել է 129 անձի կալանավելու մասին, որոնց մեծ մասը հայեր են: Նրանց կասկածում են հանցագործությունների, այդ թվում՝ զենք պահելու ու զարդերի գողությունների մեջ: Կասկածյալներին ձերբակալել ու կալանավորել են Իսպանիայում ու Ֆրանսիայում: Նրանցից մի քանիսը միջազգային հանցավոր խմբի բարձրաստիճան անդամներ են:
Հայաստանի ազգային հավաքականի հարձակվող Յուրա Մովսիսյանն ու շվեդական «Յուրգորդենը» խզել են պայմանագիրը: Պաշտոնական հայտարարությունը տարածել է շվեդական ակումբի մամուլի ծառայությունը: Հունիսին Մովսիսյանը վիրահատվել էր, իսկ վերականգնողական փուլը կտեւի մինչեւ սեպտեմբեր: Հայ ֆուտբոլիստը վնասվածք էր ստացել մայիսի 17-ին Շվեդիայի առաջնության 9-րդ տուրի խաղի հենց առաջին խաղակեսում: Մովսիսյանը, փաստորեն, երեք ամսից քիչ ավելի անցկացրեց «Յուրգորդեն»-ում, թեեւ մարտի վերջին 6 ամիս ժամկետով պայմանագիր էր կնքել շվեդական ակումբի հետ:
Հուլիսի 6-ին հանրապետությունում սպասվում է առանց տեղումների եղանակ: Օդի ջերմաստիճանը հուլիսի 6-7-ը 3-4 աստիճանով կնվազի: Երեւանում նույնպես վաղը տեղումներ չեն լինի: Մայրաքաղաքում գիշերը կդիտվի +24+26, ցերեկը՝ +39+41 աստիճան տաքություն:
