Ուժգորոդում կայացել է Ուկրաինայի հայերի միության երկրորդ եռամսյակային համաժողովը, որի շրջանակում, արդեն ձեւավորված ավանդույթի համաձայն, հյուրընկալող քաղաքի հիվանդանոցներից մեկին անհրաժեշտ բուժսարքավորում են նվիրել։
Ինչպես հայտնում է AnalitikaUA.net պարբերականը՝ վկայակոչելով Ուկրաինայի հայերի միության մամուլի ծառայությունը, ՈՒՀՄ գործադիր տնօրենի պաշտոնակատար Հովակիմ Հարությունյանը՝ Անդրկարպատյան մարզի հայկական մշակույթի «Արարատ» միության նախագահ Կարեն Ենոքյանի ու Անդրկարպատյան մարզում ՈՒՀՄ ներկայացուցիչ Հովհաննես Նիկողոսյանի հետ միասին Ուժգորոդի քաղաքային մանկական կլինիկական հիվանդանոցին են փոխանցել ցածր հաճախության էլեկտրաթերապիայի երկու նոր սարք, որոնք նախատեսված են տարբեր հիվանդությունների լայն սպեկտրի բուժման համար։ Սարքավորումների նվիրատվության արարողությունը տեղի է ունեցել մինչեւ համաժողովի աշխատանքային նստաշրջանը։
Համաժողովին մասնակցում էին ՈՒՀՄ նախագահ Վիլեն Շատվորյանը, Անդրկարպատյան մարզային պետվարչակազմի ղեկավար Գենադի Մոսկալը, Ուժգորոդի քաղաքապետ Բոգդան Անդրեեւը, ՀԱԵ ուկրաինական թեմի ղեկավար, Մարկոս եպիսկոպոս Հովհաննիսյանը, Օդեսայում Հայաստանի գլխավոր հյուպատոս Հայկ Ղուլյանը, հայկական տարածաշրջանային կազմակերպությունների ղեկավարներ, Ուժգորոդի հայկական համայնքի ակտիվիստներ ու տեղական քաղաքային իշխանությունների ներկայացուցիչներ։
Համաժողովի շրջանակում ամփոփվել են ՈՒՀՄ կրթաթոշակային ծրագրի արդյունքները, ու կազմակերպության նախագահ Վիլեն Շատվորյանը արդեն երկրորդ անգամ պարգեւատրել է ուսման մեջ բարձր ցուցանիշներ ունեցող հայ ուսանողներին։
Քննարկվել են ՈՒՀՄ հրատապ խնդիրները, ամփոփվել են անցած եռամսյակի արդյունքները, ներկայացվել ապագա ծրագրերը, նաեւ բարձրացվել է Ուժգորոդում հայկական եկեղեցի կառուցելու հարցը, իսկ մարզի պետական աշխատակազմի ղեկավար Գենադի Մոսկալը առաջարկել է եկեղեցու հետ միասին անպայման կառուցել նաեւ հայոց լեզվի դպրոց ու երաշխավորել է այս հարցում իշխանությունների ամբողջական աջակցությունը։