Օգոստոսի 28-ին Ազգային ժողովի արտահերթ նստաշրջան կգումարվի: Որոշումն այսօր կայացրել է կառավարությունը: Օրակարգում «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին» նախագիծն է: Դրանով նախատեսվում է 2018 թվականին ավելացնել Սեւանա լճից ջրառը՝ 170 մլն խմ-ից հասցնելով 210 մլն խմ-ի: Այդ կերպ կառավարությունը փորձում է լուծել ոռոգման ջրի դեֆիցիտը: Հարցը ներկայացնելիս Նիկոլ Փաշինյանն ասել է՝ սա նոր կառավարության օրակարգում ներառված, թերեւս, ամենաանցանկալի հարցերից է:
Վարչապետը վերջերս պարզել է, որ Հայաստանում ոչ միայն «ստվերային տնտեսություն», այլեւ «ստվերային գյուղատնտեսություն» կա: Դրանք նույնպես ջրային չարաշահումների պատճառ են դառնում: Գյուղնախարար Արթուր Խաչատրյանը դժվարացել է նշել, «ստվերային այգիների» հետեւում օլիգարխնե՞ր են, թե՞ շարքային քաղաքացիներ: Ընդգծել է միայն, որ խնդիրը պետք է համայնաքապետարաններին անհանգստացնի, քանի որ դա ազդում է համայնքային բյուջեի վրա:
Երեկ ֆեյսբուքյան ուղիղ եթերում վարչապետը հայտարարել էր միկրոբիզնեսի եւ արտադրանք թողարկող ընկերությունների նկատմամբ մեղմ վարչարարություն իրականացնելու անհրաժեշտության մասին: Կառավարությունը պատրաստվում է Հարկային օրենսգրքում համապատասխան փոփոխություններ առաջարկել: ՊԵԿ նախագահն այսօր ասել է՝ սեպտեմբերին Ազգային ժողով փոփոխությունների փաթեթ կներկայացնեն:
Դավիթ Անանյանը նաեւ նշել է, որ եկամտահարկի նվազեցման 8-9 սցենար կա: Կառավարությունում արդեն քննարկումներ են ընթանում, եւ ՊԵԿ նախագահը հույս ունի, որ արդեն սեպտեմբերին այդ հարցով միասնական դիրքորոշում կունենան: Ինչ վերաբերում է ԱԱՀ-ին:
Ռոբերտ Քոչարյանը «Զվարթնոց»-ում որեւէ բաժնեմաս չունի եւ երբեւէ չի ունեցել: Նման հաղորդագրություն է տարածել «Արմենիա միջազգային օդանավակայաններ» ընկերությունը՝ արձագանքելով լրատվամիջոցներում տարածված լուրերին: Վերջերս տված հարցազրույցում Հայաստանի երկրորդ նախագահն ինքն էլ հերքել էր այդ տեղեկությունը: «Արմենիա միջազգային օդանավակայանները» նաեւ պատրաստակամություն է հայտնել այս փաստը հաստատելու համար համապատասխան փաստաթղթեր ներկայացնել:
Ոստիկանության անձնագրերի եւ վիզաների վարչությունը ԿԸՀ-ին է ներկայացրել Երեւանի ընտրողների թիվը. սեպտեմբերի 23-ին կայանալիք քվեարկությանը մասնակցելու իրավունք ունի 853.390 քաղաքացի: Ընտրողների ցուցակը ոստիկանության կայքում կտեղադրվի սեպտեմբերի 3-ին: Իսկ ընտրություններին մասնակցելու մտադրություն ունեցող քաղաքական ուժերը պետք է փաստաթղթերը ԿԸՀ ներկայացնեն մինչեւ օգոստոսի 29-ը: Ինչ վերաբերում է քարոզարշավին. հաշվի առնելով, որ այս ընտրություններն արտահերթ են, քարոզարշավը կտեւի ընդամենը 12 օր՝ սեպտեմբերի 10-21-ը: Այս պահի դրությամբ, Երեւանի ավագանու ընտրություններին մասնակցելու մտադրություն է հայտնել 9 քաղաքական ուժ: ՀԱԿ-ը չի մասնակցի այս ընտրություններին, իսկ ՀՅԴ-ում դեռ քննարկում են հարցը:
Գերմանիայի կանցլերի՝ Հարավային Կովկաս կարճատեւ այցի օրակարգը հայտնի է: Անգելա Մերկելն այսօր արդեն Վրաստանում է, օգոստոսի 24-ին կժամանի Հայաստան, իսկ հաջորդ օրը կմեկնի Ադրբեջան: Թբիլիսիում եւ Երեւանում նախանշված հանդիպումներում նա կքննարկի երկկողմ հարաբերությունների օրակարգային հարցեր, իսկ Բաքվում կանդրադառնա նաեւ մարդու իրավունքների, մամուլի ազատության եւ քաղաքացիական հասարակության խնդիրներին: Անգելա Մերկելը պատրաստվում է նաեւ Ադրբեջանի ղեկավարության հետ խոսել Բաքվի հայտնի «սեւ ցուցակի» մասին, որում օրերս Արցախ այցելելու համար ընդգրկվել է նաեւ նրա գլխավորած կուսակցությունից պատգամավոր Ալբերտ Վայլերը:
Բաքվի որոշումը դատապարտել է նաեւ պաշտոնական Ստեփանակերտը եւ Վայլերին կրկին Արցախ այցելելու հրավեր ուղարկել՝ «Գերմանիա-Հարավային Կովկաս» խորհրդարանական խմբի հետ համագործակցությանն առնչվող հարցեր քննարկելու համար:
Օգոստոսի 23-ին դոլարը, եվրոն եւ ռուբլին էժանացել են: Դոլարի փոխարժեքը կազմել է 482 դրամ, եվրոյինը՝ 558, ռուբլունը՝ 7 դրամ 00 լումա, ֆունտինը՝ 621 դրամ:
Օգոստոսի 24-ին Լոռիում եւ Տավուշում սպասվում է թույլ անձրեւ, առանձին հատվածներում՝ մառախուղ: Օդի ջերմաստիճանը 2-3 աստիճանով կբարձրանա: Երեւանում վաղը տեղումներ չեն սպասվում: Մայրաքաղաքում գիշերը կդիտվի +19+21, ցերեկը՝ +32+34 աստիճան տաքություն: