Բիզնես Արմենիայի եւ լիբանանյան «Գարդենիա Գրեյն Դոր» ընկերության համագործակցությամբ կազմակերպվել է լիբանանցի գործարարներից եւ պետական պաշտոնյաներից կազմված պատվիրակության այցը Հայաստան։

Հայաստանի զարգացման հիմնադրամից NEWS.am-ին հայտնում են, որ նախորդ 2 օրերի մշակութային-ճանաչողական օրակարգից հետո պատվիրակությունն այսօր գործնական քննարկումները սկսել է ՀՀ տնտեսական զարգացման եւ ներդրումների նախարար Արծվիկ Մինասյանի հետ հանդիպմամբ։ Հանդիպմանը մասնակցել է Բիզնես Արմենիայի գործադիր տնօրեն Արմեն Ավակ Ավակյանը, քննարկվել են նոր ներդրումների հետ կապված հարցեր։

Ավելի վաղ՝ 2017 թ. դեկտեմբերին եւ 2018-ի մարտին (վարչապետի գլխավորությամբ) տեղի են ունեցել հայաստանյան գործարար առաքելությունները դեպի Լիբանան։

Լիբանանյան ներդրողները Հայաստանում հիմնականում հետաքրքրված են գյուղատնտեսության, էներգետիկայի, կառուցապատման եւ այլ ոլորտներով։ Այցելության վերջին օրը նախատեսված է հանդիպում՝ «գործարար զրույցներ» ձեւաչափով։

Լիբանանյան պատվիրակությունը հանդիպումներ կունենա նաեւ ՀՀ նախագահ Արմեն Սարգսյանի, Գյուղատնտեսության, Խաղողագործության եւ գինեգործության, Զբոսաշրջության, Վերականգնվող էներգետիկայի եւ էներգախնայողության հիմնադրամների ղեկավարների հետ։ 5-օրյա գործարար առաքելության ընթացքում լիբանանցի ձեռներեցները կայցելեն նաեւ Շիրակի մարզ։