Նույնիսկ լավագույն պայմանների դեպքում Գլենդելի 100 հազար հայը Հայաստան չի վերադառնա: Այս մասին NEWS.am-ին ասաց Գլենդելի քաղաքապետ Զարեհ Սինանյանը՝ պատասխանելով այն հարցին, թե արդյոք հեղափոխությունից հետո Գլենդելի հայությունը մտադիր է վերադառնալ հայրենիք:
«Շարժում սկսել է, դա անկասկած է, մարդիկ կան, որոնք արդեն տեղափոխվել են: Հասկանում եմ, որ շատերը թերահավատորեն են վերաբերում, ասում են՝ բա ուր է ներհոսքը, բայց հոսքը կա: Իհարկե, նույնիսկ լավագույն պայմանների դեպքում Գլենդելի 100 հազար հայը Հայաստան չի վերադառնալու, այդպիսի բան չի լինելու, բայց որ մարդիկ մտածում են, որ կարող են իրենց ապագան կապել հայրենիքի հետ, դա միանշանակ է»,- ասաց Զարեհ Սինանյանը:
Անդրադառնալով ԱՄՆ-ում ապրող հայերի կողմից Հայաստանում հնարավոր ներդրումներին՝ Գլենդելի քաղաքապետը նշեց. «Մարդիկ, որոնք նախկինումնույնիսկ չէին մտածում Հայաստանում ներդրումներ անելու մասին, այսօր արդեն այդ ուղղությամբ մտածում են: Մարդկանց հոգեբանությունը փոխվել է, սակայն, սպասողական վիճակում են, ուզում են հասկանալ՝ այս փոփոխություններն ինչքան երկարատեւ են, ուզում են հասկանալ՝ ինչ է կատարվում Հայաստանի բիզնես բնագավառում, մի քիչ զգուշավոր են այս պահին: Իհարկե, սառույցն արդեն կոտրվել է: Մարդիկ պետք է երաշխիքներ ունենան, որ իրենց ներդրումները պաշտպանված են լինելու, ապա այդ գործընթացը մեծ թափ կհավաքի»:
