«Լույս» նախընտրական դաշինքի անդամ Անահիտ Բախշյանը հերքեց լուրերը, որ Երեւանի ավագանու ընտրություններից հետո «Լույսն» իր ձայները տալու է այլ քաղաքական ուժի: Սեպտեմբերի 13-ին մամուլի ասուլիսի ժամանակ նա նշեց, որ նման խոսակցություններն իրականությանը չեն համապատասխանում: «Դրանք հիմար խոսակցություններ են: Մենք մեր դիմագիծն ունենք, մեր սկզբունքները: Ավագանիում մենք հանդես կգանք որպես «Լույս» դաշինք»,- հայտարարեց նա:
Անահիտ Բախշյանը վարչապետին իր սեփական՝ «Երկրի հակառակ կողմը» գրքից մեջբերում հիշեցրեց. «Գրքում գրված է, որ հեղափոխականի գլխավոր խնդիրն է չկրկնել այն գործողությունները, որոնց դեմ ինքը պայքարել է: Սա գրվել է 10 տարի առաջ: Սակայն այսօր մենք հայտարարություններ ենք լսում սեւ եւ սպիտակ ուժերի մասին, որոնք հակասական զգացումներ են առաջացնում»,- նշեց Բախշյանը: «Մենք հավատում ենք վարչապետի գաղափարներին, իսկ նրանք այսպիսի հայտարարություններ են բարձրաձայնում: Այլեւս նման բան թող չանեն»,- հավելեց նա:
Բախշյանը նաեւ քննադատեց Փաշինյանի հայտարարությունը որոշ ուժերի մասին, որոնք հեղափոխական ներկայանալով՝ Հանրապետական կուսակցության հետ անդրկուլիսային բանակցություններ են վարում: «Այսպիսի ընդհանրական հայտարարությունները մեր վարչապետին չեն սազում: Մենք փոքր երկիր ունենք, բոլորը միմյանց ճանաչում են, շատերն իրար հետ ընկերություն են անում: Այս մոտեցումը եւ այս կարգախոսները պետք է դադարեցվեն»,- շեշտեց նա:
