Արցախի հարցում բանակցային գործընթացի մեջ աշխատելու կանոններից մեկը նաեւ համաձայնեցված կերպով հայտարարելն է հանդիպման օրը, ժամը, վայրը: Այս մասին, այսօր՝ սեպտեմբերի 17-ին, Արցախում լրագրողների հետ ճեպազրույցում նշել է Հայաստանի ԱԳ նախարար Զոհրաբ Մնացականյանը՝ անդրադառնալով իր եւ Ադրբեջանի ԱԳ նախարար Էլմար Մամեդյարովի հնարավոր հանդիպմանը:
«Մենք հավատարիմ ենք մնում բանակցային խաղաղ գործընթացին՝ ձեւավորված եւ միջազգային հանրության կողմից ընդունված ձեւաչափի շրջանակներում, որը կոչվում է Մինսկի խմբի համանախագահություն: Այո՛, սա շարունակական գործընթաց է, այն լինելու է:
Արդեն մեկ անգամ նշել եմ, կրկնեմ, որ հարգում եմ նման գործընթացի մեջ աշխատելու կանոնները, եւ այդ կանոններից մեկը նաեւ համաձայնեցված կերպով հայտարարելն է հանդիպման օրը, ժամը, վայրը:
Վստահ եղեք, որ այդ ամենը կարվի հենց համաձայնեցված ձեւով եւ բնականաբար հասանելի կլինի բոլորին: Շնորհակալություն»,-հայտարարել է Զոհրաբ Մնացականյանը:
