Չափազանց տրամաբանական է, որ Երեւանի ավագանու արտահերթ ընտրություններից հետո կարճ ժամկետում պետք է անցկացվեն արտահերթ խորհրդարանական ընտրություններ։ Այս մասին սեպտեմբերի 24-ին՝ լրագրողների հետ զրույցում հայտարարել է քաղաքագետ, «Կովկաս» ինստիտուտի տնօրեն Ալեքսանդր Իսկանդարյանը։
Այսպես, փորձագետի կարծիքով, տրամաբանական կլինի, եթե Երեւանի ավագանու հաջող ընտրություններից հետո վարչապետը որոշի անցկացնել ԱԺ արտահերթ խորհրդարանական ընտրություններ, քանի որ հանգիստ կարող է հիմնվել լայն սոցիալական աջակցության վրա, որի ապացույցն է դարձել նախօրեին անցկացված ընտրարշավը մայրաքաղաքում։
«Ես կարծում եմ, որ կարճ ժամկետներում արտահերթ խորհրդարանական ընտրությունների անցկացման հավանականությունը բավականին մեծ է, քանի որ դա ռացիոնալ է...Այդպիսի խորհրդարանը ինչեւ 2022 թվականը պահելը հեշտ չի լինի եւ նրանք կբախվեն կառավարման բնույթի խնդիրների»,–պարզաբանեց Իսկանդարյանը։
Միաժամանակ, քաղաքագետը նկատեց, որ մինչեւ 2022 թվականը նման բարձր ժողովրդականություն պահելը վարչապետի ու նրա թիմի համար բավականին բարդ կլինի, քանի որ այն էյֆորիան, որ առաջացել է եւ դեռ պահպանվում է իշխանափոխությունից հետո, վաղ թե ուշ անկում կապրի, որը, բնական է, չի բխում ՀՀ գործող իշխանությունների շահերից։